BATA consegue a licenza para executar o plan de obras do novo centro de día
AROUSA
A Asociación comezará as obras de acondicionamento na escola unitaria de Guillán
10 jul 2026 . Actualizado a las 05:00 h.Bandeira branca para o proxecto do novo centro de día para persoas do espectro autista. A Xerencia de Urbanismo aprobou onte a concesión da licenza para executar as obras. A iniciativa impulsada pola Asociación Autismo BATA xa ten vía libre para comezar a adecuación da antiga escola unitaria de Guillán como novo centro de día.
O proxecto permitirá dar resposta ás necesidades das familias de persoas con trastornos do espectro autista, que ata o momento atopaban importantes dificultades para acceder a prazas asistenciais especializadas debido á plena ocupación das instalacións da Laxe. A posta en marcha deste novo servizo será posible grazas á colaboración do Concello de Vilagarcía, que cedeu á asociación o edificio da antiga escola tras o peche do centro educativo por parte da Consellería de Educación.
Con esta aprobación, BATA xa pode iniciar a reforma do inmoble. A colaboración municipal, con todo, vai máis alá da cesión do inmoble e do patio, formalizada por un período de vinte anos. O Concello tamén facilitou a axilización dos trámites urbanísticos necesarios para poder desenvolver o proxecto.
Tras moitos anos de espera, a posta en marcha deste centro completa a batería de iniciativas de inclusión impulsadas polo Concello. Entre elas figuran a brigada de xardinería, o reparto de publicidade, así como a cesión da antiga escola unitaria do Pedroso e dun inmoble en Vilaxoán para o desenvolvemento doutros proxectos da asociación