Manu Santos: «Despois de tantas incidencias, saímos bastante airosos da primeira volta
AROUSA
O Cortegada supera o parcial inicial en zona de fase de ascenso. Manu Santos confía en dispoñer a finais de semana do recambio para a cortada Maira Horford
14 ene 2026 . Actualizado a las 05:00 h.Rematar a fase regular do campionato entre os catro primeiros do seu grupo e optar así ao ascenso á Liga Challenge. Este era o punto de partida do novo proxecto do Mariscos Antón Cortegada tras disputar como anfitrión a última fase e apostar por un home da casa, Manu Santos, para dirixir a misión desde o banco de Fontecarmoa. Un reto que se lle puxo costa arriba ao equipo desde o momento en que chegou ao primeiro partido coa metade do seu cadro de xogadoras sen facer a pretempada e dúas delas sen sequera estar dispoñibles para o primeiro encontro da Liga. E pese a todo, trece partidos despois, o cadro vilagarcián avanza polo bo camiño, pechando a zona de fase de ascenso, cuarto cun balance de 9 vitorias e 4 derrotas.
«Tivemos moitas incidencias. Catro das nove xogadoras non fixeron a pretempada. María Angulo sufriu unha rotura de fibras nos isquios a primeira semana e non xogou ata a segunda xornada, dúas das tres estranxeiras chegaron mes e medio tarde, e a outra, Maira (Horford) dous meses», recorda o adestrador do Mariscos Antón. «E agora que comezabamos a coller carreira, empezamos o ano con seis xogadoras», lamenta, con María Angulo baixa a lo menos un mes máis tras saírselle un ombro na derradeira xornada do 2025, con Marta Sanmartín recuperándose dunha escordadura de nocello —onte seguía sen poder adestrar— e con Horford xa cousa do pasado, tras rescindir ambas as dúas partes o contrato da á-pívot brasileira con pasaporte dominicano.
Así as cousas, «saímos bastante airosos no deportivo», declara Manu Santos. Faino engadindo de seguido un pero: «Pero todas estes problemas están incidindo na consistencia do noso xogo». E isto último é toda unha preocupación para o adestrador con medio campionato inda por diante, nunha Liga «máis igualada do habitual, calquera equipo pode gañarlle a calquera, só ao Maristas se lle ve por riba do resto», di.
Con este panorama, Santos considera indispensable reforzar xa o xogo interior do equipo. De feito, confía en ter unha nova xogadora a finais desta mesma semana.