Do movemento Attac

Avelino Ochoa
Avelino Ochoa VENTO DA TRAVESÍA

AROUSA

ANGEL MANSO

03 abr 2022 . Actualizado a las 19:44 h.

Un día destes descubrín que Vento da Travesía lese lonxe da nosa comarca. Desde moita distancia, unha esquecida amizade escribiume para preguntarme se era membro de Attac, xa que lle parecía, por algún dos contidos, que me convertera no voceiro dese movemento. Estrañoulle non saber dalgunha sección local de Attac nunha zona tan viva como Arousa. Tal asociación partiu de Ignacio Ramonet (Redondela, 1943), doutor en Semioloxía e Historia da Cultura, catedrático de Teoría da Comunicación, profesor na Sorbona, director de Le Monde Diplomatique en español e, entre outras distincións, doutor Honoris Causa pola Universidade de Santiago; unha das principais figuras mundiais do movemento altermundista, quen en decembro de 1997 provocou o seu nacemento cunha editorial en Le Monde Diplomatique na que propuxo a taxa Tobin e denunciou que a globalización tiña construído o seu propio Estado, co seu aparato, redes de influencia e medios de acción completamente independentes da sociedade e que actuaba desestruturando as economías nacionais, desprezando os principios democráticos, presionando aos Estados, esixindo máis e máis beneficios e, en fin, aumentando as desigualdades sociais.

Esa foi a semente deste movemento internacional. Attac denuncia a ditadura dos mercados e a especulación financeira, e busca alternativas sociais, ecolóxicas e democráticas para construír un mundo máis xusto. Neste momento histórico no que a globalización creou, como describe Ramonet, o seu propio Estado supranacional, cunha constelación de organismos (FMI, Banco Mundial, OMC, etc.) que falan a unha soa voz para exaltar as virtudes do mercado e que alcanzaron máis poder que os parlamentos e institucións democráticas de cada país, Attac vén evidenciando a falta de control e regulación dos movementos de capitais, a existencia de guaridas fiscais, as políticas impositivas que favorecen ás grandes fortunas e fomentan a desproporción dos soldos millonarios dos directivos, a sobrexplotación dos recursos naturais, a inseguridade ambiental xerada por determinados sectores industriais, o desinterese pola redución e reciclaxe de residuos e a privatización dos bens e servizos públicos para convertelos en mercancías obxecto de substanciosos negocios.

Busca ofrecerlle á cidadanía un espazo de reflexión e debate democrático para impulsar unha acción política transformadora fronte á tiranía e á opresión dos mercados financeiros. Acaba de facer un manifesto contra a guerra de Ucraína dicindo que: «As razóns aducidas polas partes en litixio, Rusia e os países membros da OTAN, para defender as súas posturas, seguridade, soberanía, liberdade, etc., e o enquistamento e inmobilidade das súas posicións, recordan momentos históricos previos ao desencadeamento de graves conflitos con terribles consecuencias económicas e humanas para millóns de persoas».