A Baixada do Umia, confirmada o sábado día 17

O Náutico O Muíño conta con repetir a alta participación do ano pasado


vilagarcía / la voz

Catro meses máis tarde, pero faráse. O Náutico O Muíño, club organizador, confirmaba onte a través das redes sociais que si, finalmente a vixésimo sexta edición da Baixada Internacional do Umia vaise celebrar este ano, e non no 2021. Suspendida o pasado mes de xuño a causa do confinamento, coincidindo a data inicialmente prevista para a proba co último treito do proceso de desescalada cara a nova normalidade, a cita disputaráse o sábado da vindeira semana, día 17, a partir das catro e media da tarde.

Este era o día barallado xa a finais de xuño polos responsables da Baixada Internacional do Umia cando a Federación Galega de Piragüismo anunciaba o seu novo calendario de regatas tras ser unha das primeiras federacións en Galicia en conseguir devolver os seus deportistas aos adestramentos, cun pioneiro protocolo específico de protección hixiénico-sanitaria máis aló da normativa xenérica fixada polas autoridades deportivas e sanitarias tanto do goberno central como do autonómico.

Categoría internacional

Foi o magnífico funcionamento deste protocolo e a súa implementación en probas oficiais, con niveis de participación que en máis dunha cita superou o medio milleiro de padexeiros, unha das principais razóns que convenceron a directiva do Muíño para acabar de darlle adiante a 26ª. Baixada do Umia, explica o director técnico do club. A condición de regata internacional outorgada este ano pola Federación Internacional de Piragüismo e o apoio do Concello de Ribadumia completan, sinalaba onte José Manuel Vázquez, os pesos que acabaron por desnivelar a balanza do lado do adiante a unha regata que multiplica a crebadura de cabeza dos seus promotores en plena segunda vagada de covid-19, máis aínda con medio Salnés afectado por restricións específicas polo preocupante aumento dos contaxios polo coronavirus.

De feito, e prevendo unha participación semellante á do 2019, cando foron uns 450 os padexeiros inscritos, a gran dúbida manexada a día de onte no Náutico O Muíño é se manter a tradicional saída única ou ben fixar dous puntos de partida para a Baixada, un desde a sede do club, en Cabanelas, e outro en Barrantes. O que si está claro é que se volverá contar con embarcacións individuais e dobres mantendo o novo trazado adoptado o ano pasado, que substituíu o descenso desde a praia de Portas por un modelo de travesía de baixada de Barrantes a Castrelo e subida á meta en Cabanelas, pasando dos 14 aos 10 quilómetros. O prazo de inscrición na Baixada Internacional do Umia permanecerá aberto ata este domingo, ás 23.59 horas.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

A Baixada do Umia, confirmada o sábado día 17