Catú, o insospeitado goleador que mantén o forte na ausencia de Beda

O Arousa débelle ao central santiagués os seus 4 puntos nos tres últimos partidos, nos que anotou tres dos cinco tantos do cadro arlequinado


vilagarcía / la voz

Con tres reforzos apuntalaba o Arousa na derradeira semana do mercado de inverno o cadro de persoal de Rafa Sáez. Tres futbolistas que elevaron desde o primeiro día o nivel dos adestramentos e o potencial do xogo arlequinados. Un deles, ademais, está a amortizar o investimento do club vilagarcián na súa fichaxe en tempo récord. E é que se o Arousa suma 4 puntos nas tres últimas xornadas, e non menos, quizais mesmo 0, é grazas á pericia goleadora de Sergio González Quintáns, Catú, o insospeitado relevo goleador do pichichi do equipo, Pedro Beda, que o domingo se perdía o terceiro dos en principio seis encontros que deberá seguir desde a grada por unha rotura fibrilar.

Catú erixíuse nun tan inesperado como efectivo substitutivo do indispensable complemento vitamínico no que se converteu esta tempada o dianteiro centro brasileiro para o Arousa na súa pelexa por volver á promoción de ascenso a Segunda B máis dun cuarto de século despois. E dicimos inesperado por canto o santiagués, cedido ata final de tempada polo Racing de Ferrol, foi incorporado como un seguro na frontal da zaga arlequinada, nin moito menos como un home-gol.

Cun tanto no minuto 26 igualaba Catú o 0-1 co que Rubén Pardo adiantaba o 9 de febreiro ás Pontes no Municipal de Vilaxoán, e coa súa segunda diana como xogador arousista o compostelán pechaba o 3-1 daquel partido no minuto 78. O pasado domingo, no mesmo escenario, o central batía o porteiro do Racing Vilalbés cazando no corazón da área o rexeite dun disparo de Pedro García tras saque de córner, e enviando un mísil sen interceptación posible entre os tres paus; era o 1-0.

«Nunca había metido tres goles tan seguidos. Es la primera vez que me pasa», comentaba onte sobre a súa xeira goleadora Catú, un xogador que fala dos catro tantos que marcou nunha das súas tempadas no Compos como a súa mellor marca persoal ata o momento nunha Liga.

Autor de tres das cinco dianas do Arousa nestas tres últimas xornadas -o gol de Róber ao Silva non se traducíu en puntos-, Catú, que suma o valor engadido de ter marcado non a balón parado, como se presuporía dun central físico coma el, senón en segundas xogadas, atribúe a circunstancia a unha cuestión de «rachas». E quítase calquera presión: «No está dentro de mi deber. Si lo hago, bien. No vengo pensando en marcar goles. Pero si lo hago, bienvenido sea».

De feito, co que se quedou o defensa do partido do pasado sábado co Racing Vilalbés foi con que «el empate nos dejó un poco tocados, por como se produce, en un córner, y cuando teníamos que haber encarrilado el partido antes del descanso».

Sobre o feito de que o Arousa se deixara 5 puntos fronte a equipos da zona media e baixa da clasificación nas dúas últimas semanas, Catú enténdeo dentro da normalidade dunha Liga na que «todos los partidos son complicados, y donde se pierden puntos en donde menos lo esperas, y al contrario». Así as cousas, conta que no vestiario da Lomba «estamos con ganas de que se juegue el siguiente partido». A visita, o sábado, a un Arzúa só 3 puntos por debaixo.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Catú, o insospeitado goleador que mantén o forte na ausencia de Beda