Beiras chama a militancia a evitar o «suicidio» do BNG

O voceiro de Encontro Irmandiño convoca na sala do auditorio a históricos membros do Bloque en Arousa


vilagarcía / la voz

Na traxectoria do nacionalismo galego contemporáneo danse dous momentos fundamentais. Un é o do abalo, o medre propiciado pola constitución, en 1982, dun instrumento sen apenas parangón nos concertos español e europeo, capaz de condensar as arelas transformadoras e recoller as necesidades do pobo galego. Outro é o da deleiba na que esa mesma organización se mergulla vinte anos despois da súa fundación, coincidindo paradoxalmente co seu ascenso ao poder autonómico e unha paralela sangría electoral. Esa forza é o BNG e esta tese é a que dende hai xa tempo abondo defende Xosé Manuel Beiras, hoxe portavoz nacional de Encontro Irmandiño.

A asemblea de outono

Presentado por Ramón Mouriño, Beiras falou o martes para un razoablemente cheo salón de conferencias do auditorio municipal, en Vilagarcía. A mensaxe era clara. O nacionalismo asómase a outro momento fundamental: a asemblea que o Bloque vai celebrar en outubro. Esta é a derradeira oportunidade, anunciou quen, quéirao el máis o menos, puxo face e cartel ao ascenso do BNG entre o electorado galego, de recuperar aquel instrumento útil, democrático e asembleario. Grazas ao labor do Encontro Irmandiño, lembrou Beiras, na asemblea poderán participar todos os militantes, facendo un aceno a quen non este afiliado pero queira participar, porque calquera que se incorpore á organización ata finais de agosto terá dereito a participar na conclave.

Se a organización, «esclerotizada, dominada polo pensamento único», sen capacidade de autocrítica e prescindindo de tantos dos seus militantes históricos non é quen de mudar, o EI sentirase libre para «navegar en mar aberto». Pero os seus responsables son perfectamente conscientes dos riscos que algo así suporía non para o Bloque, senón para Galicia: ter que retroceder ata niveis anteriores aos acadados polo BNG e deixar que os consellos de administración das grandes multinacionais sigan guiando o destino dos pobos sen ningún control democrático. «Os dereitos que no se exercen, pérdense», advertiu o antigo voceiro nacional do Bloque. E algo saberá Beiras desta lea logo de tanto tempo.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
3 votos

Beiras chama a militancia a evitar o «suicidio» do BNG