A biblioteca de Vilagarcía conmemorou o día das letras infantís e xuvenís premiando aos mellores usuarios
13 abr 2010 . Actualizado a las 02:00 h.Dise que o mes de abril é o mes da auga. Pero tamén, cada vez máis, é o mes dos libros e da lectura. O día 2 conmemórase unha xornada internacional dedicada ao libro infantil e xuvenil, data á que a biblioteca Rosalía de Castro de Vilagarcía non quixo quedar allea. Onte mesmo entregáronse os premios aos mellores usuarios do servizo de préstamo dos centros que conforman a rede municipal. Ademais, os actos conmemorativos dese día completáronse coa actuación dun contacontos e coa lectura dun manifesto.
Dez nenos con idades comprendidas entre os 6 e os 14 anos foron premiados na décima edición deses galardóns. Todos eles son usuarios do servizo de préstamo a domicilio na sección infantil e xuvenil da rede municipal de bibliotecas, integrada pola biblioteca pública municipal Rosalía de Castro e polas axencias de lectura de Carril, Bamio e Vilaxoán. Para poder optar a eses recoñecementos, os usuarios tiñan que ter a tarxeta de préstamo cunha antigüidade de polo menos seis meses, ademais de ter retirado no último ano alomenos catro libros en meses diferentes.
Os premios teñen como obxectivo recoñecer a constancia e a fidelidade dos máis pequenos na utilización do servizo de préstamo, ademais de fomentar a utilización da biblioteca e os hábitos de lectura. E para premiar aos amantes das letras, nada mellor que un lote de libros adaptado ás idades dos rapaces galardoados. Ademais, os nenos tamén recibiron un diploma acreditativo.
Os premiados deste ano son Laura Fernández Blanco, Nelly Piñeiro Fernández, Raúl Longa Cancelo, Javier Piñeiro Maneiro, Cristian Gómez Triñanes, Francisco Cerqueiras Diéguez, Salek Hadj Núñez, Claudia Garrigós Pérez, Marco Hadj Núñez e Juan Rodríguez Sousa.
Aínda que a data desta conmemoración é o 2 de abril, dada a coincidencia este ano coas vacacións de Semana Santa, a Organización española para el libro infantil y juvenil propuxo trasladar esta data ao día 12. Daí os actos programados na xornada de onte.
Ademais da entrega de premios, que se celebrou ás cinco da tarde, a sala infantil da biblioteca acolleu na mañá de onte unha sesión de contacontos titulada Dada o Duende , na que participaron nenos dos colexios dos municipios. Esta actividade está enmarcada dentro do programa Letras Vivas. Ao remate da sesión leuse o manifesto pola lectura que redactou o escritor Eliacer Cansino.