Xa están á venda as entradas para o festival que ten lugar este domingo
14 dic 2007 . Actualizado a las 02:00 h.Nada menos que 17 agrupacións distintas participan este domingo, a partir das sete da tarde, no décimo Festival de Panxoliñas de Cáritas Interparroquial de Arousa. Loli Piñeiro, membro da directiva, presentou onte un certame no que cada un dos grupos corais interpretará dúas pezas. As entradas, a un prezo de tres euros, poden mercarse xa na casa da cultura e, durante o sábado e o domingo, no auditorio.
O elenco está formado pola coral Brisas de Guillán, o colexio Filipense, Peques Coda, Coda Infantil, Escola Coda, Vilariño-Cambados, Sobradelo, Trabanca, Vilaxoán, Sisán e Barrantes, Alento Xoven de Carril, Rosalía de Castro de Carril, Cantares As Burgas de Cuntis, Xunqueira, Cortegada, Cánticos de Amil (Moraña) e Rondalla Gato Negro de Carril. Esta última formación, a última en actuar, ficará no escenario para interpretar, xunto co resto das corais que volverán subir -estamos a falar dunhas trescentas persoas- para interpretar conxuntamente Noite de Paz. Presenta o televisivo Manuel Torrente.
Se a organización marca un prezo para as butacas, explicou o director de Cáritas de Arousa, Francisco Fernández, é para evitar experiencias pasadas nas que as entradas se esgotaban pero ao cabo había sitios baleiros.
23 pezas para Caritarte
Por outra banda, Fernández e o responsable municipal de Cultura, Xosé Castro Ratón, fixeron balance da mostra Caritarte, que por terceiro ano consecutivo promoveu o fotógrafo José Luiz Oubiña. Ao cabo, vendéronse 23 das 98 obras que 85 artistas expuxeron durante un mes na sala Rivas Briones. A recadación total foi de 5.620 euros; 4.450 euros procederon da venda das obras mentres que Caixa Galicia aportou arredor de 1.200 euros máis. Ratón garantiu que a Rivas Briones xa está reservada para o vindeiro ano. «O importante -concluíu Manuel Castroagudín, o consiliario- é a concienciación da sociedade».