«Este libro é unha promesa a Don Francisco»

O seu mestre, Rivera Casás, é unha das razóns de ser dun volume sobre San Ciprián e A Mariña


Pablo Mosquera «Bígaro» presentou onte, co patrocinio do Concello de Cervo, o libro Islas Cyprianus: orgullo y patrimonio, do que o alcalde cervense Alfonso Villares di: «É un libro que nos ofrece a oportunidade, tanto ás novas xeracións como aos que temos máis idade, de mergullarnos na nosa orixe». 460 páxinas cheas de nomes propios e historias e do cariño que Mosquera sente por San Ciprián e arredores. Tamén un documento onde reflicte o privilexio que sentíu ao ser alumno de Rivera Casás e escoitar ás xentes do mar.

-É un libro moi sentimental.

-Por dous motivos. É un compromiso, unha promesa. Eu tiña unha relación moi especial con Don Francisco Rivera Casás, que sempre falaba dos seus alumnos, como Manolo Barros Quelle. Eu prometinlle continuar a súa obra. Tiñamos unhas conversas tremendas. Podo contar una anécdota.Cando me nomean xerente do hospital (...) na primeira fila estaban meus pais e Don Francisco. Coma sempre, antes de empezar a falar pedíalle permiso e cando remataba sempre lle preguntaba ‘Don Francisco, que ten que dicir?’ por se me tiña que facer algunha correción(...) A primeira persoa pola que eu escribo este libro é el. A segunda é o orgullo que sinto de ser dunha xeración especial. Fun un privilexiado porque o normal con 12 anos era coller o petate e ir ao mar. Tiña unha parte boa que era a formación, a tradición oral, escoitar aos patróns, que eran os nosos heroes. A mala era que ían de chó, de muchacho home para todo. Don Francisco era un home tremendamente relixioso, sensible co paisaxe e a cultura. Foi o primeiro que falou da importancia do castro da Atalaia. Eu era un pícaro e escoitaba a Don Francisco falar de que San Ciprián era un pobo moi importante, que había unha poboación celta que se relacionara por mar con moitos pobos, cos normandos, fenicios, árabes, romanos... e ensinounos a linguaxe dos ventos. Ser de San Ciprián non era calquera cousa. Ademáis, o orgullo non o perdín nunca.

-En que época lle houbera gustado nacer aquí?

-Teño dúas nas que me houbera gustado moitísimo nacer. Unha é a caza da balea e a bronca coa Igrexa e cos vascos, no XIV, que chegaban cuns barcos grandes. Empeza a sementeira dos pósitos, a organizarse a xente, e o sangue do mamífero espantaba os bancos da sardiña... Por aí veñen os pleitos. E coa Igrexa; o poder infinito que tivo en Galicia. O pago dos diezmos ven de aí. En cada balea que se cazaba (que non se pescaba), de dez barriles de saín (o aceite, que era o petróleo da Idade Media), un ía para a Igrexa e a aleta tamén(...) Neste libro trato de recoller o patrimonio. Por exemplo, o surgidero de baleas máis antigo de Galicia é San Ciprián. Estaba no Cabalo.

-Outra etapa da que lle houbera gustado ser testemuña?

-O Concello de Cervo tén dúas cousas importantísimas que o diferencian doutros. Un é a balea e outro é Sargadelos, a segunda etapa onde a min me houbera gustado nacer. No ano 1750, cando tiña concedida a cédula o que vai ser o Marqués de Sargadelos, haber vivido a folga revolucionaria do 30 de abril de 1798... Houbérame gustado coñecer a Ibáñez porque debeu ser moi intelixente. Ademáis, eu seguinlle toda a pista. Coñeceu a Cester en Ribadeo e é ao que lle di ‘a Ilustración en España consiste en que no tengamos que importar cosas de fuera, que las hagamos aquí’. Dixo que o futuro era a louza e o vidro.

-Neste volume non só fala de Cervo, tamén da Mariña.

-José María Rodríguez, cura de Vilaselán, como Cal Pardo, dedicouse á investigación pero a del ten algo importantísimo. Demostra que cando falamos de Britonia falamos da diócese máis antiga ao sur de Europa fundada por Maeloc. E demostra que Britonia é o que vai ser logo a Diócese de Mondoñedo. Nós somos Britonia, o que nos leva a San Martiño, lugar importantísimo. Britonia é outra razón máis de orgullo, de traballo, de investigación...

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
3 votos
Tags
Comentarios

«Este libro é unha promesa a Don Francisco»