«O problema na Mariña é a falla de personal»

A policía focense pide que lles faciliten os mesmos medios que teñen outros corpos


FOZ / LA VOZ

Chabely Díaz, nada hai 35 anos en Cordido (Foz) e con case quince anos de servizo na Policía Local de Foz e dous en comisión de servizos na de Pontevedra, ocupa actualmente o cargo de portavoz na Ugpol, a recén creada asociación de policías locais de Galicia.

-Nace nun momento especial...

-Nos últimos anos a Policía Local foi adquirindo moitísimas competencias. Esíxese un nivel formativo elevado; o requisito para entrar na Policía Local é superior ó do resto de corpos policiais. Cada vez nos van metendo máis competencias, cada vez hai máis inquietudes, máis intervencións, solicítanse máis medios... Se se nos esixe o mesmo ou máis ca outras forzas e corpos de seguridade, tamén entendemos que se nos ten que dar o mesmo ou igualar. En base a iso empezamos coas solicitudes de chalecos, solicitude de armas longas, a raíz dos atentados, e tamén participar activamente nas comisións de coordinación da Xunta.

-¿Sabe cantos asociados son agora mesmo?

-Sobre 180.

-¿Teñen tamén na Mariña?

-Penso que practicamente temos en toda A Mariña. Burela ten representación e tamén Ribadeo, Viveiro, Foz...

-¿Como ve a situación da Policía Local na comarca?

-Aquí hai bastante falta de medios. Cada corpo de Policía Local é diferente; aínda que levamos o mesmo uniforme e estamos regulados pola mesma lei, cada corpo é independente, depende da entidade local. Uns están mellor e outros peor. Si que se nota falta de medios en relación a etilómetros, drogotex... O que solicitamos tamén é que nos sitios onde haxa revólveres se substitúan por pistolas. É o que di o decreto que nos regula. Cada un ten que levar arma co seu cargador, a parte de que os revólveres son un perigo. Nun enfrontamento armado xa non é só a precisión; alguén cun revólver pode facer seis disparos, e se acabou. Os que levamos pistola temos trinta, ou 34 disparos, depende da pistola (...) É o mínimo, non só para cumprir a lexislación, senón para non poñer en perigo a ninguén. Non podes reaccionar coa mesma eficiencia cun revólver que cunha pistola, e menos cando o ataque se produce cunha arma letal. Co revólver estás limitado.

-¿Queda aínda xente con revólver?

-Non moitos, pero aínda queda. Por iso que se trata de que todos teñamos os mesmos medios, as mesmas dotacións e reivindicar o tema da seguridade. Somos unha policía que estamos en primeira liña, me refiro á cercanía ó cidadán. Se hai un evento, festas, procesións... estamos sempre no medio dos cidadáns, con competencias en tráfico e en seguridade cidadá. Se nese momento hai unha pelexa, alguén cun coitelo, somos os primeiros que imos reaccionar por proximidade.

-Aquí, na Mariña, hai policías que fan patrullas unipersoais...

-Si. Mandamos un escrito, por protección ós cidadáns e autoprotección, pedindo que non se permitan este tipo de patrullas. A parte de que non se cumpre o ratio. En moitas plantillas non manteñen os efectivos que tiñan .

-¿Cal é o maior problema que teñen na comarca?

-Falta de persoal, sobre todo. A falta de persoal é bastante palpable e xa non en casos extremos. A nós, en Foz, que Fomento nos cedeu o que era a antiga carretera nacional, nun accidente de tráfico necesítanse dúas persoas, unha para regular o tráfico e garantir a seguridade dos intervintes, feridos, implicados e outra para ir tomando datos. Cunha persoa sola estase poñendo en perigo a seguridade vial, a seguridade das propias persoas e a do propio axente.

-¿Hai deterioro de medios ou redución de persoal neste últimos tempos?

-En Foz ata fai uns anos sempre se contou con auxiliar de Policía Local. Agora dende fai anos non se solicita ese persoal auxiliar e non temos unha capacidade de resposta acorde ó número de poboación que hai. Se se producen chamadas por varias incidencias, hai unha patrulla sola e se estamos regulando non podemos ir a ocuparnos delas, sexa un bado, unha pelexa, problemas de convivencia, ou recibir unha denuncia. Estamos asumindo moitísimo traballo dúas e ás veces unha soa persoa. Ás veces por vacacións ou baixas laborais e demais, hai unha persoa soa no pobo. E mantéñense os mesmos efectivos tanto no inverno como no verán, pero o número de poboación aumenta.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
8 votos
Comentarios

«O problema na Mariña é a falla de personal»