O grupo Descarga ao Vivo recupera pezas do antigo alcalde Antonio Rodríguez, exilado a Cuba en 1936.
30 jun 2009 . Actualizado a las 17:37 h.O grupo musical galego-cubano Descarga ao Vivo, que realizará unha xira pola Coruña, Santiago e Vigo a finais de xullo, recupera varias pezas do músico soberino Antonio Rodríguez, que desenvolveu unha importante carreira en Cuba despois de exilarse en 1936 a causa da Guerra Civil. Rodríguez foi director da Banda de Sober e durante un breve período foi alcalde do municipio, cargo ao que accedeu a raíz das eleccións nas que venceu a Frente Popular.
A formación Descarga ao Vivo, presentada o ano pasado na Feira do Libro da Habana, pretende afondar nas vínculos musicais entre Galicia e Cuba e inclúe no seu repertorio diversas pezas de autores galegos emigrados á illa desde finais do século XIX ou relacionados con ela dalgunha outra maneira. De Antonio Rodríguez figuran dúas composicións tituladas Hermoso cielo cubano e Caldeliñas , xunto con melodías de Pascual Veiga, Guillermo M. Tomás e José Castro Chané, entre outros compositores.
A figura do músico soberino, falecido a mediados dos anos 60, tamén está a ser recuperada no seu municipio natal. A Banda de Sober non ten ningunha composición súa no seu repertorio, pero está buscando partituras coa idea de incorporalas ao seu acervo musical.
Reunindo material
A asociación cultural O Colado do Vento está tratando de reunir datos biográficos e calquera tipo de material relacionado con esta figura esquecida na súa terra de orixe que deixou unha fonda pegada na illa de Cuba como autor dun grande número de pezas para orquestras de baile.
O grupo Descarga ao Vivo foi impulsado por aCentral Folque, un proxecto surxido no Conservatorio de Música Tradicional e Folque de Lalín. Na proxecto, coordinado polo músico e investigador Ramón Pinheiro, participan coñecidos músicos galegos como Marcos Teira, Guadi Galego, Ugia Pedreira ou Xabier Díaz, xunto con intérpretes cubanos como Alejandro Vargas, Raciel Jiménez ou Adonis Ríos.