«Algúns preguntan incluso se poderían vir coa familia»

Pedro Hombre Pombo (Malpica, 1944, en Suíza dende 1970) xa avisaba un pouco antes do mes de decembro do ano pasado de que algo raro estaba pasando: empezaba a haber xente que preguntaba se habería traballo por aló. Daquela parecía unha anécdota, casos moi contados sen importancia. Hoxe, aquel goteo chamativo xa empeza a parecer outra cousa. Leva case toda a súa vida emigrante dedicado ao mundo asociativo.

-¿Como van indo as cousas?

-Non se poden dar cifras, porque non as hai. Dende os consulados si nos informan de que vai en aumento a xente que volve. Pero hai moitos que non queren que se saiba, é moi complicado ter datos. Pero si se percibe, vendo o que hai, o que che van contando...

-¿Chámano a vostede dende España preguntando como está a situación?

-Nas últimas semanas chamáronme entre 15 e 20 coñecidos de todas partes de Galicia a ver se lles atopaba algo. Algúns preguntan incluso se poderían vir coa familia. É unha tendencia evidente, que está aí.

-¿E hai traballo?

-Hai moitas obras en marcha, e as empresas están collendo moita man de obra barata, de emigrantes doutros países que foron chegando. Pero o galego é un emigrante que traballa ben, as empresas máis fortes saben que o galegos son moi bos. Temos prestixio, somos coñecidos, e iso axuda.

-¿Pensa que se vai recuperar a emigración a Suíza?

-Non, e non sería bo que retornase a xente. Pero hai que ver as cousas como están, a xente está no paro e ten que traballar. E se non hai traballo en España buscan fóra. Eu coñezo exemplos de casas con catro ou cinco parados. ¿Que fas ante circunstancias coma estas?

-¿Cal é o soldo dun obreiro da construción?

-Depende de moitos factores, pero antes podían sacar de media uns 3.800 ou 4.000 francos (entre 2.500 y 2.650 euros), e agora, menos. Cambiaron os soldos e tamén o sistema de traballo. Por exemplo, as empresas case non fan horas extraordinarias. Os tempos son outros.

---

---

---