Pensa igualar os dereitos dunha viúva con dous fillos a unha divorciada/solteira con dous fillos, xa que as primeiras son consideradas familia numerosa, mentres que as segundas non.
ELECCIONES GALLEGAS 2009
Alberto Núñez Feijoo
«Haberá axudas ás familias monoparentais»
«O meu compromiso nesta cuestión é claro: as familias monoparentais que, por esta circunstancia, deban enfrontarse a situacións de desvantaxe, terán a consideración de familia numerosa e poderán acceder ás novas posibilidades que ofreceremos a este colectivo en áreas como a educación (exención ou bonificación de taxas universitarias), vivenda (maior oferta de pisos protexidos e superficie axeitada ás necesidades reais), bonificacións para residencias e actividades de ocio, deportivas e culturais, así como no acceso ás novas tecnoloxías».
Emilio Pérez Touriño
«Seguiremos traballando pola igualdade»
«Durante estes anos de goberno o que fixemos foi aprobar e levar á práctica leis e acordos de vital importancia para lograr a igualdade real de dereitos e oportunidades das mulleres en todos os ámbitos da vida, como a Lei do traballo en igualdade das mulleres, a Lei integral para o tratamento da violencia de xénero ou o incremento da taxa de emprego feminino ata case o 57%. Nese camiño seguiremos traballando. En calquera caso, impulsaremos o diálogo necesario para acabar con calquera situación que poida menoscabar o dereito dunha muller a obter na situación que vostede comenta as axudas pertinentes, independentemente do seu estado civil».
Anxo Quintana
«O recoñecemento é unha competencia estatal»
«O recoñecemento da condición de numerosa ás familias monoparentais con dous fillos a cargo é unha competencia estatal. Non obstante, o BNG ten defendido este recoñecemento, co seu apoio á Lei de Orzamentos do Estado para o 2009, que obriga ao Goberno central a levar a cabo as modificacións legais necesarias para que tal equiparación sexa realmente efectiva. Así mesmo, desde a Vicepresidencia da Xunta temos posto en marcha numerosas iniciativas en favor destas familias. Esta cuestión é un bo exemplo da necesidade dun maior autogoberno».