27 nov 2009 . Actualizado a las 02:00 h.
Todos os lugares chamados Tarrío que visitamos están a continuación ou tras dun río, de acordo coa etimoloxía deste topónimo, que procede do sintagma latino trasns rivum, aparecendo Tarrío coa súa forma etimolóxica «Transrivum», e a intermedia «Trasrío»", en documentos da Idade Media. Así, entre outros lugares, Tarrío dá nome a dúas aldeas de Porto do Son, que se atopan tras ou detrás das súas respectivas correntes fluviais; detalle natural que tamén amosa, por exemplo, outro Tarrío do concello de Dodro. Para chegar dende o orixinal Trans rivum ao actual Tarrío produciuse unha redución de trans a tras, perdeuse o s perante o r, o que deu Trarrío, e, finalmente, caeu o primeiro r por disimilación do segundo.