Esta tarde preséntase en Santiago a obra poética de Franco Grande reunida en «Un intre no tempo»
SANTIAGO
O volume agrupa os catro poemarios do escritor galeguista
19 feb 2026 . Actualizado a las 18:34 h.O volume Un intre no tempo. Poesía reunida 1967-2017, que agrupa a obra poética de Xosé Luís Franco Grande (Tebra, 1936-Vigo, 2020) será presentada esta tarde, ás seis, no Pazo de San Roque, en Santiago, nun acto aberto ao público no que intervirán Valentín García, secretario xeral da Lingua; a editora do libro, Teresa Seara; as fillas do autor, Rosalía e Navia Franco; e o director de Editorial Galaxia, Xosé Manuel Soutullo.
Este libro, publicado a finais do ano pasado por Galaxia, reúne os catro poemarios do literato, avogado e académico galeguista, Entre o si e o non (1967), O tempo á espreita (1987), Xoguetes do tempo (2015) e Libro das abandonadas (2017).
Un intre no tempo inclúe un limiar e un estudo biográfico e da obra poética de Franco Grande realizados por Teresa Seara, que mantivo a estrutura cronolóxica dos distintos poemarios. A filóloga e editora considera que Xosé Luís Franco Grande é un poeta «moi versificador, traballa moi ben a métrica e o ritmo do poema, e faino cunha riqueza léxica realmente marabillosa».