Rosalía Bernárdez Riopedre e Pablo González Faginas gañan os Premios Literarios Minerva organizados polo Colexio M. Peleteiro de Santiago

Pablo González Faginas, do Colexio Obradoiro da Coruña, na modalidade de narración, e Rosalía Bernárdez Riopedre, do IES Leiras Pulpeiro de Lugo, na categoría de poesía, foron os gañadores da 52ª edición dos Premios Literarios Minerva organizados polo Colexio M. Peleteiro. A entrega dos galardóns será o 11 de abril no marco dun acto literario.

O xurado, que se reuniu este xoves, destacou o nivel dos traballos premiados, tanto as obras poéticas como os relatos. «É unha boa mostra da puxanza e da forza deste talento novo», afirmou o secretario do certame e profesor do colexio M. Peleteiro, Mon G. Buhigas.

Na modalidade de narración houbo 18 traballos finalistas. Ademais do gañador, Pablo González Faginas, polo seu relato «O Veloso», houbo outras catro distincións. O segundo premio foi para Almudena Souto, do IES Rosalía de Castro de Santiago, por «Setenta e dúas pesetas». Seguiulle Rosalía Bernárdez Riopedre —gañadora tamén do certame de poesía— por «Verba Volant». Os accésit foron para Celia López, do IES de Quiroga, e Abril Viqueira, do IES de Ordes.

En poesía, con 19 finalistas, a «Distraccións» de Rosalía Bernárdez, seguíronlle «Litoral catártico (Versos noctámbulos á deriva)», de Iris Abril, do IES Salvaterra de Miño; e «A miña avoa», de Claudia Caamaño, do Colexio Calasanz PP Escolapios da Coruña, segunda e terceira, respectivamente. Houbo, ademais, tres accésit: María Maronho, do CPI Fonte Díaz de Touro; Pablo Loira, do IES Johan Carballeira de Bueu; e Amalia Blanco, do IES Terra do Xallas de Santa Comba.

---

---

---