A biblioteca Ánxel Casal celebra o Día das Letras Galegas con contacontos, sesión de xogos e un concurso de carteis, ademais da mostra sobre María Victoria Moreno, que empezou o 25 de abril e pecha hoxe.
Os interesados no concurso de carteis teñen ata o día 12 de maio para presentar os seus traballos no mostrador da sala infantil. A entrega de premios será o mércores 16 ás 18 horas.
Por outra banda, haberá dobre sesión de contacontos. Este sábado Lisístrata renderá homenaxe a María Victoria Moreno, mentres que o día 19 Juste Kamishibai ofrecerá o seu espectáculo A illa do vento. Estas sesións están dirixidas a nenos de entre tres e doce anos.
O martes 15, ás 10 horas, celebrarase o Gran Xogo das Letras Galegas, onde os participantes coñecerán máis sobre a orixe e o significado do Día das Letras Galegas e os autores homenaxeados. É a única actividade con acceso limitado da programación.