José Ramón González Juanatey, presidente da Sociedad Española de Cardiología, recomenda non consumir máis de 1.200 miligramos ao día, en tres tomas
14 abr 2015 . Actualizado a las 05:00 h.As recomendacións da Axencia Española do Medicamento, alicerzadas nun relatorio do Comité para a Avaliación de Riscos en Farmacovixilancia europeo «son algo xa coñecido. A Sociedade Española de Cardioloxía, con outras sociedades, dixemos hai máis dun ano nun documento, que sobre todo en doentes de alto risco cardiovascular hai que limitar o uso de antiinflamatorios non esteroideos (Aines), como o ibuprofeno», según afirmó José Ramón González Juanatey, xefe de Cardioloxía do Clínico de Santiago e presidente da Sociedad Española de Cardiología.
-¿Como recomendan o ibuprofeno?
-Como recomendación xeral, o ideal é que o tratamento non supere as dúas semanas e non consumir máis de 1.200 miligramos ao día, en tres tomas. Para doses máis elevadas ten que haber prescrición e control dun facultativo.
-¿Por que hai tanta preocupación con este fármaco?
-Porque en España é un medicamento moi consumido, xa que é moi accesible, mesmo sen receita. Hai persoas que o consomen para problemas de saúde moi diferentes. É quizá o fármaco con máis automedicación e uso indiscriminado, e de forma prolongada no tempo, de aí a preocupación das axencias europea e española do medicamento, que é moi relevante.
-¿Por que lle prestan tanta atención os especialistas de cardioloxía?
-Porque para doentes con risco cardiovascular elevado hai máis posibilidades de complicacións graves, sobre todo se padeceron un infarto, ictus, ou insuficiencia cardíaca. Neses casos non deben tomar doses de 2.400 miligramos ao día, se o fan deben consultar co seu médico ou cardiólogo.
-¿Hai incompatibilidade entre ibuprofeno e aspirina?
-Quen toma ibuprofeno para o tratamento da dor ou como antiinflamatorio non debera tomar aspirina; a non ser que use a aspirina como protección cardiovascular.