Dicía o autor de O paxaro azul, o nobel belga Maurice Maeterlinck, que «o pasado sempre está presente». Trátase dun axioma que facilmente podería aplicarse a mostra que, impulsada pola Asociación Sociocultural Cedofeita, se desenvolve no mosteiro de Lérez e que leva por título De troulas e devocións. Festas populares de Lérez.
A mostra, a través de fotografías en branco e negro, así como de textos e documentos, achega ao visitante ás festas que se celebraron nesta parroquia pontevedresa entre os séculos XIX e XXI. Trátase dun ciclo festivo que se abre coa festa adicada a san Sebastián, ao tempo a exposición recupera para a memoria eventos, moitos deles xa perdidos, como o enterro da sardiña.
A mostra destaca que a única festa popular aínda viva actualmente é a de san Bieito, que se celebra dúas veces o ano. Co devagar do tempo perdéronse, entre outras, as adicadas ao Divino Salvador, que estes días se celebran en Poio, e das que queda como recordo o programa da edición do 2014, ano no que La Torre e París de Oza foron as últimas orquestras que amenizaron esta festividade: «A partir dos anos setenta do século pasado, a xuventude comezou a preferir outras diversións -discotecas, pubs, concertos...- e progresivamente deixáronlle de interesarlle as festas patronais».
De troulas e devocións dedica, de igual modo, un espazo ao Burgo, que no 1996 naceu como parroquia e que, polo tanto, mantén «vencellos históricos» con Lérez.