O Libro Xigante permitirá hoxe aos ilustradores dar forma a contos inventados polos nenos
07 mar 2020 . Actualizado a las 05:00 h.Con moito sentido do humor e ansias de consumir cultura. Así arrancou onte o Salón do Libro en Pontevedra, que abriu as súas portas co espectáculo musical dirixido por Marcelo Dobode e con Soledad Felloza e NEE Barros como presentadores. A inauguración contou coas intervencións de Xingro’s Big Band, o coro da Xunqueira 1 e Manuel Albariñas.
Durante esta primeira fin de semana non faltará a presenza de habituais do Salón como Baobab teatro estreando espectáculo, Luís Davila, PoloCorreo do Vento, Odaiko, Anxo Fariña etc.
Hoxe non faltará un dos clásicos do Salón que máis cativos atrae: o Libro Xigante. Unha actividade na que os ilustradores dan forma a contos inventados polos nenos para ser recompilados neste caso no quinto volume. Terá lugar en horario matinal e de tarde sen inscrición previa.
Completarán a xornada de hoxe numerosas actividades como o contacontos do «galego»-italiano afincado en Madrid, Simone Negrín de balde no anfiteatro do Recinto Feiral ás 12.30, e tamén con outros contos o domingo 8 ás 18.15 horas, as actividades da comunidade italiana afincada en Pontevedra, Mater Lingua ou o espectáculo de clown «Nono» de Pista Catro de balde no anfiteatro do recinto ás 18 horas, ou o espectáculo musical de Odaiko «Vaia circo» no auditorio ás 19 horas entre outros.
Como outra das novidades os bebés contarán nesta edición con máis actividades. Hoxe sábado ás 17.30 horas poderán gozas dos contos «Corochas» de Atenea García, de balde pero con cabida limitada.
Continuando cos máis pequenos, na xornada de mañá domingo Baobab estreará o seu novo espectáculo «Ris Ras» destinado a crianzas de 1 a 7 anos con pase triplo ás 12, 17 e 18.30 horas.
Unha morea de obradoiros chegarán o domingo con Ceo Aberto, Reviravolta, Taller Abierto ou novamente os amigos de Mater Lingua e tamén os contos con Simone Negrí e PoloCorreo, pero tamén haberá actividades para un público xuvenil.