Chega o Ano de María Victoria Moreno

O acto central do 17 de maio celebrarase nesta cidade e o Salón do Libro estará dedicado á escritora pontevedresa

.

O presidente da Real Academia Galega confirmou onte en Pontevedra que o 17 de maio o acto central do Día das Letras Galegas 2018, dedicado a escritora e profesora pontevedresa María Victoria Moreno, celebrarase no Teatro Principal desta cidade, onde, como é habitual nesa data, reunirase o plenario da RAG en sesión extraordinaria.

Víctor Freixanes, acompañado polo secretario da institución lingüística, Henrique Monteagudo, e da tesoreira, Marilar Aleixandre, mantivo onte unha reunión no Concello co alcalde, Miguel Anxo Fernández Lores, e a concelleira de Cultura, Carme Fouces, para abordar as liñas xerais da programación do Ano María Victoria Moreno.

Ao homenaxe que se lle renderá a esta recoñecida escritora súmase o Salón do Libro Infantil e Xuvenil que se celebrará en abril no Pazo da Cultura baixo a temática Mulleres de Conto. Ela será una peza clave do salón, no que tamén terá presenza a Real Academia Galega, e outras citas culturais.

O goberno local porá a disposición da RAG todos os medios necesarios para darlle maior relevancia aos actos que vai celebrar nesta cidade, a maiores dos que organizará o propio Concello e mesmo a Deputación ao longo do ano, nos que se pretende implicar a toda a cidadanía.

Tratala reunión mantida onte, Víctor Freixanes destacou que aínda que María Victoria Moreno naceu nun pobo de Cáceres (Valencia de Alcántara) por elección propia era galega e pontevedresa. «A miña relación con Galicia e a miña opción pola súa lingua é simplemente unha historia de amor» declarou ela mesma.

O presidente da RAG referiuse ás razóns nas que se fundamenta a súa elección como figura das Letras Galegas 2018: A calidade da súa obra coa que enriqueceu o noso idioma, tanta na narrativa infantil e xuvenil como nos estudos literarios, no ensaio e na poesía; pola súa condición de ensinante da lingua e a literatura galegas; tamén por decidir ser galega e pola aposta da Academia de darlle as mulleres a posición e representatividade que merecen na vida do país.

Votación
0 votos
Comentarios

Chega o Ano de María Victoria Moreno