Centos de rapaces disfrutaron onte cos populares bonecos no Salón do Libro Infantil e Xuvenil
17 mar 2013 . Actualizado a las 07:00 h.O universo Bolechas volveu a despregar onte toda a súa enerxía no Salón do Libro Infantil e Xuvenil, que xa vai pola décimo sexta xornada e a partir de mañá enfilará a derradeira semana de actividades. Os nenos gozaron ao longo de todo o día cos populares bonecos creados por Pepe Carreiro e as súas cancións nun karaoke. Participaron nun divertido photocall virtual no que se retrataron con eles en diversas situacións para enviar logo a foto por correo electrónico e gardala de recordo. E xa pola tarde, Os Bolechas voltaron ao Pazo da Cultura a toda máquina para estar nun obradoiro de man do seu creador.
Oespectáculo de percusión para bebés e familia Aupa Leré foi outra das propostas do salón para o fin de semana. Xirando en torno aos catro elementos da natureza (auga, aire, terra e lume) e engadindo elementos característicos nas rutinas da infancia (os xoguetes, a lúa e o sol, a merenda...) fóronse sucedendo cancións orixinais con textos sinxelos e pasaxes musicais con instrumentos da familia da percusión, que se repartiron ao público para tocar e expresar colectivamente a creación artística. A xornada completouse co obradoiro de elaboración de minicontos A Maquichola, a cargo de Teresa Gómez Pino, e rematou co espectáculo musical A cidade das máquinas, conto inédito de Óscar González, con Eva Diz como narradora e a música da Orquesta Filharmónica Cidade de Pontevedra. Hoxe haberá máis.
Vermú entre libros
Non moi lonxe do Pazo da Cultura, na Libraría Paz, iniciábase onte un novo camiño de encontros con autores que se repetirán un sábado ao mes. O Vermú entre libros pretende mostrar outras facetas da persoa convidada nun ambiente animado e participativo. Elena Gallego, autora da triloxía Dragal, inaugurou este espazo conversando coa xornalista Teresa Cuíñas. A escritora publicou a triloxia Dragal entre o 2010 e 2012. E o primeiro libro A herdanza do dragón, que vai pola quinta edición, resultou finalista do IV Premio Caixa Galicia de literatura xuvenil e recibiu o premio Frei Martín Sarmiento o ano pasado.