¡ARRE HO! | O |
10 jun 2003 . Actualizado a las 07:00 h.ANTES de votar, deberiamos poder ver o libro de instruccións do candidato. Así non habería posibilidade de que ocorrese o de onte na Asamblea de Madrid, onde a incomparecencia de dous parlamentarios do PSOE fixo posible que a presidenta sexa do PP. Un dos dous ausentes ameazou xa con non apoiar ó candidato do seu partido á presidencia do goberno autonómico, o que daría o control da comunidade ós populares. En plena época de pactos poselectorais -en Pontevedra, en Bueu, en Marín, en Vilaboa- todo isto pon os pelos de punta. ¿Como é posible que os candidatos garden a súa axenda ata que son elixidos? ¿Por que ser tránsfuga é máis barato que pagar a factura da grúa? ¿A conto de que nos piden os nosos dirixentes que confiemos neles? Fíxense no que lle caeu enriba a The New York Times polas reportaxes falsas dun redactor: o director dimitiu, e mundo do xornalismo clamou pola ruptura do fío de credibilidade que une a un periódico cos lectores. Pero claro, en política «rectificar» soa igual de raro que «escafurcio». Neste país podemos dar clases.