¡ARRE HO!
01 nov 2002 . Actualizado a las 06:00 h.HAI DEZ MESES morreu Lee Robinson, un tipo raro e honesto, segundo dicían. Nacera en Birmingham, no Reino Unido, a finais dos cincuenta, pero o Madrid dos oitenta acabou por atrapalo. Robinson, que chegou á cidade tocando a batería nos Fortunate Sons, un grupo formado por históricos do rock dos setenta, quedou alí ata que o levou un cancro. Pero deixou pegada na música desta parte do mundo, como vocalista dos A-10 ou dos meus adorados Sin City Six -creo que decidiron seguir adiante con outro cantante-, un grupo que fai música co corazón e non coa billeteira, e, contrariamente ó que parecen coas súas pintas de espectáculo white thrash , son un millón de veces máis profesionais que calquera divillo de moda. Cos Sin City Six, Lee Robinson veu dúas veces a Pontevedra. A primeira, no Camawey, estivo a punto de rematar en pelexa porque un pelma non deixou de insultar ó cantante ata que este pregou o pé do seu micro e llo pasou por diante dos dentes, ameazante. A segunda vez, meses antes de morrer Robinson, foron o mellor daquel festival Félix Rock que se celebrara na praza de touros. Hoxe marcho a Malasaña a perseguir a pantasma de Lee Robinson. Xa lles contarei.