As publicacións deberán ter sido editadas ao longo do presente ano
01 dic 2017 . Actualizado a las 17:32 h.Os concellos de Boborás e O Carballiño, co apoio da Deputación de Ourense, promoven dende mediados dos 80 os premios que honran a memoria de Antón Losada Diéguez. A convocatoria corre por conta dos concellos, alternando cada ano a organización dos premios, e Boborás anunciou onte a nova edición deste galardón. A trixésimo terceira edición dos Premios Losada Diéguez manterá os dous apartados que contempla esta convocatoria -Creación Literaria e Investigación e Ensaio- e a dotación económica dos mesmos: 6.000 euros para cada un dos dous premios. As obras que se presenten a concurso deberán ter sido editadas no presente ano natural, entre o 1 de xaneiro e o 31 de decembro do 2017, e estar escritas en galego. Non se admitirán publicacións escolares, por fascículos, obras premiadas con anterioridade en certames con dotación económica ou reimpresións. O prazo de presentación das obras a concurso rematará o 31 de xaneiro do 2018 e as mesmas deberán ser remitidas ao Concello de Boborás, por ser o convocante desta edición. O nome dos gañadores será dado a coñecer en abril e a entrega dos mesmos realizarase nun acto que se desenvolverá o 9 de xuño do 2018 no pazo de Moldes, lugar de nacemento de Antón Losada Diéguez. As universidades galegas, o Consello da Cultura, a Real Academia Galega e o Museo do Pobo figuran no xurado.