Turistas


Xoga ao dominó, pasea pola vila, vai á festa de aniversario da muller dun amigo... Carlos Slim, un deses homes que na conta corrente ten máis cartos dos que moitos podemos imaxinar (supoño que a xente como Neymar, con esa cláusula de rescisión, tampouco lle soa tan raro) podería pasar en Ourense como un xubilado máis que cada verán volta á casa. Porque o mexicano non é un turista, aínda que non estea censado aquí. Slim é un case (porque o que ten raíces aquí é o seu amigo Olegario Vázquez Raña) antigo veciño de Avión que volta cada verán (ou cada dous) á terra na que está cómodo. E iso vese aínda (en realidade, grazas a iso) que cada un dos seus movementos estea seguido por cámaras fotográficas. E Slim, que sae nos xornais, ben podería usarse como exemplo dunha grande parte dos mal chamados turistas que veñen cada ano á provincia e que fan que moitos lugares do rural estean estes días cheos de vida. Non son turistas, porque non veñen coñecer algo que non coñecen; son visitantes porque visitan un lugar que lles gusta, no que son felices e están tranquilos, e no que moitas veces teñen as súas raíces familiares. Mágoa que toda esa xente dure por Ourense o que dure o mes de agosto. Mágoa que esas rúas cheas de cativos volvan en moitos casos ser espazo de reunión dos seus avós porque os meniños marcharon, seguindo a uns pais (ou uns avós) que un día fixeron a maleta para ir buscar unha vida mellor. Así que agosto segue a ser un espellismo do marabilloso que sería volver ver as aldeas cheas de xentes, cheas de meniños que xogan... E de xubilados mexicanos que xogan ao dominó.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Turistas