A aldea do municipio de Chaves foi obxecto dunha dura represión en 1946 por acoller a guerrilleiros e fuxidos galegos
19 may 2024 . Actualizado a las 19:50 h.Cambedo da Raia, un pequeno pobo da contorna de Chaves, forma parte dos lugares sinalados da memoria histórica e da loita contra as ditaduras de Franco e Salazar. O lugar era zona de refuxio para os guerrilleiros que loitaban contra o réxime franquista e de fuxidos que cruzaban para Portugal como un primeiro paso de camiño cara ao exilio ou á emigración do outro lado do Atlántico. En 1946 ía celebrarse unha xuntanza das guerrillas no Cambedo da Raia e o pobo foi arrodeado e tomado por gardas civís españois e xendarmes portugueses. Tiráronse bombas e houbo unha masacre de guerrilleiros e fuxidos, e mesmo algún veciño.
Carlos Silva, do Centro Cultural de Vilarelho da Raia, e o historiador Luis Martínez-Risco organizaron un acto de lembranza en 1996 e foi daquela cando se colocou un monólito co gallo dos 50 anos dos feitos. Martínez-Risco publicou, co apoio de Amigos da República, un libro sobre a resistencia de Cambedo da Raia e a solidaridade dos seus veciños no ano 2004.
Agora o Goberno de Portugal, na celebración do cincuenta aniversario do 25 de abril e na lembranza da memoria colectiva, vai realizar unha homenaxe o vindeiro día 1 de xuño ao pobo de Cambedo. Entre os convidados figura a Asociación de Amigos da República de Ourense. Entre os participantes está confirmada a presenza do ex presidente da Asemblea da República de Portugal, Augusto Santos Silva.