Persoas maiores


a estou nunha idade na que vou ao parque cos netos, porque teño a sorte de ser avó, pese que a nosa sociedade ten nais primerizas cada vez máis maiores. No meu caso son afortunado e podo xogar con eles, ensinarlles cousas… Os netos traen alegría, e gustaríame que isto lle sucedese tamén aos demais.

Consciente de que somos unha das provincias máis envellecidas, e sen entrar nos motivos, si que podemos falar dalgunhas das consecuencias. Vivimos máis anos, pero a cuestión é como, con que calidade de vida. Creo que no noso caso, e segundo imos avanzando no camiño da vida, á morriña propia dos galegos súmase a soidade non elixida.

Persoal e institucionalmente como presidente de Cruz Vermella, estou seguro de que un dos principais retos que afrontan as persoas maiores é o illamento social, unha situación que as fai vulnerables e contra a que debemos loitar. En España, máis de 2 millóns de persoas maiores de 65 anos viven soas, das que o 72% son mulleres. Igualmente en Ourense. O perfil das persoas atendidas por Cruz Vermella ten rostro de muller: elas son protagonistas das actividades, das atencións que realizamos, das axudas que entregamos e da formación que damos ás coidadoras. Porque non é un segredo que tamén son elas as que se ocupan de persoas dependentes, coa sobrecarga física e emocional que isto conleva.

Non todas as persoas que están soas experimentan soidade, e pola contra hai moitas que se senten soas estando acompañadas. É un sentimento subxectivo, negativo, pero que non está asociado a unha idade concreta.

Mais nós, especialmente no rural, debemos traballar para reducir ese illamento social involuntario: mellorando o seu benestar emocional, restaurando as súas conexións sociais da man do voluntariado e de múltiples actividades, como poden ser obradoiros de memoria, ximnasia, teatro… O noso labor é traballar para as persoas maiores e coas persoas maiores, tendo en conta o seu criterio e as necesidades das persoas coidadoras para aumentar a súa resiliencia: fortalecendo as súas capacidades e autonomía fronte a novas situación vitais, de saúde, familiares e do seu entorno.

Envellecer é un proceso natural que comeza cando nacemos: a clave para o benestar nas últimas etapas da vida pasa por un modelo de envellecemento activo, participativo e saudable, asumindo os cambios con optimismo e positividade. A súa valía reside na experiencia, no saber acumulado dos anos do que non podemos prescindir, xa que nel perviven tamén as nosas tradicións e cultura popular.

Unha sociedade do século XXI, como a nosa, ten que ter a máxima protección para as persoas máis vulnerables, entre as que nenos, nenas e persoas maiores son as máis indefensas. Acompañar ás persoas maiores e fomentar o seu bo trato é unha obriga por humanidade. Pero é unha tarefa compartida entre as distintas administracións e organizacións, para a que hai que conciliar políticas sociais, sanitarias, económicas e de vivenda, e así garantir unha vida digna ás persoas maiores e unha sociedade inclusiva que evite a fenda interxeracional. Sumemos as nosas forzas para non deixar a ninguén atrás.

Felipe Ferreiro Feijoo es presidente de Cruz Vermella en la provincia de Ourense.

Conoce nuestra newsletter con toda la actualidad de Ourense

Hemos creado para ti una selección de noticias de la ciudad y su área metropolitana para que las recibas en tu correo electrónico. Descubre nuestro nuevo servicio.

Votación
1 votos
Comentarios

Persoas maiores