Pardo Bazán queixábase de que nas noticias de prensa sobre sucesos quedaba sempre sen saber como acababan. A min pásame o mesmo . Nesta ocasión trátase da violación nunha praia de Xixón. Unha moza de 19 anos, que ten unha perna escaiolada, vaise á praia cun inmigrante de Panamá ao que acaba de coñecer, que ten 29 anos e que se atopa en situación irregular. Os feitos suceden entre as nove e as once da noite do mes de xullo. El estende unha toalla na area e a moza tómbase; situación que aproveita o emigrante para botárselle encima, suxeitala e empezar a bicala. Ela, segundo a acusación, dille repetidamente que pare, pero el dille: «A min gústame facelo así, voute deixar embarazada» e repetíalle que calase, que lles ían a oír. Ademais de violala, róuballe a carteira, que contén 45 euros. A moza denuncia; hai xuízo. A Fiscalía impútalle ao acusado un delito de agresión sexual e delitos leves de lesións e furto coa agravante de abuso de superioridade. Pide 9 anos e medio de cárcere, unha orde de afastamento a menos de 500 metros durante dez anos e medio, e unha multa de 960 euros, así como unha indemnización á vítima de 3.000 euros polo dano moral, 200 euros polas lesións e 25 euros por roubo. Tamén pide que, se hai condena, unha vez cumprida a pena de prisión obrigatoria substitúase a liberdade condicionada pola expulsión ao país de orixe.
Oxalá que na sentenza non aparezan xustificacións do tipo «á praia de noite», «tombarse cun descoñecido», «puido defenderse, pedir auxilio», para rebaixar a condena.
Xa veremos…