Fran


Naceu Fran (fillo de Inés e Francisco), o segundo neto do gran Paco Mariló. Primeiro foi Daniela (filla de Goretti e Víctor), unha marabilla, e agora nace esta prenda preciosa que leva o nome do meu amigo. Chameino, obviamente. Faltoulle pouco para botarse a chorar. Dous netos, recentemente vacinado, pleno de saúde e con ganas de facer unha celebración por todo o alto. Non vai poder ser. Cautela, prudencia, sentidiño. E con esas andamos. Creo que levo máis de catorce meses sen abrazar ao meu amigo e tal circunstancia xa resulta insoportable. Polo tanto é preciso conxurármonos contra o covid. Porque fronte á súa malicia, hai seres que nos devolven a bondade en cada segundo. Fran, por exemplo. Naceu con abril, que quere dicir abrir: abrir as portas dun novo tempo. A felicidade, talvez. Declárome canso e farto das malas noticias. Declárome canso e farto das cifras pérfidas e das tristezas. Declárome canso e farto desta época que non podo soportar. Polo tanto, dende esta contraportada, reclamo a reconquista da felicidade. Porque non todo son negruras. Está Fran, tan lindo. Respirando. Saíndo a correr a vida, con catro días: esta vida que debe abandonar o lado escuro e os pesares. Fran é optimismo. Detrás de todo isto, está el. A súa luz e a súa ventura. A risa do meu amigo mentres falaba comigo por teléfono porque hai semanas que non nos vemos. A alegría ditando o seu pentagrama de música de baile, agarrados, bicándonos, brindando coa mesma copa. Temos o deber urxente de mirar a Fran. Aos nenos que nacen. Pese as malas noticias e as noticias dos malos (esta cloaca en que se está convertendo a campaña electoral madrileña). Pese a Caín, queda Abel. Queda Fran. Queda a vida.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
27 votos
Comentarios

Fran