Deixando aparte ás de exaltación partidista, a finalidade dunha manifestación é concienciar á opinión publica dunha situación inxusta, e procurar así a solución.
Nese sentido, e pese ao risco de contaxios que implica, compréndese a do gremio da hostalería para chamar a atención sobre a súa excepcional situación e a falta de axuda económica que padecen. Mesmo, se me apuran, enténdese que persoas de boa vontade se manifesten de forma pacífica en defensa da liberdade de expresión, aínda que despois grupos organizados convertan a manifestación nunha intolerable serie de actos vandálicos.
O que non se entende é o que pretenden as manifestacións feministas do 8 de marzo. A do ano pasado foi un absoluto desastre. O Goberno aprendeu a lección e este ano prohibiunas en Madrid (así non se lle contaxiarán as ministras) e lavouse as mans respecto ao resto das comunidades. Pronto veremos as consecuencias desa medida ao Poncio Pilatos.
As manifestacións do 8M non van concienciar á sociedade dos problemas das mulleres. Só aumentarán os ataques ao feminismo. Eses actos poden provocar aumento de contaxios, e por conseguinte mortes, e tamén medidas restritivas, peche de terrazas e peches perimetrais. Moita xente pensará que as feministas, e en xeral as mulleres, só nos defendémos a nós mesmas, que somos unhas irresponsables, e que non nos importa o prezo que outras persoas pagarán polo gusto de «algunhas tolas» de saír á rúa o 8M. Manifestarse nas circunstancias actuais é dar un paso atrás en todos os sentidos.