Por que convén un Goberno progresista

Gonzalo Caballero
Gonzalo Caballero LIÑA ABERTA

OPINIÓN

05 ene 2020 . Actualizado a las 05:00 h.

Toda democracia representativa necesita dun goberno. Tras varios meses cun Goberno en funcións, hai que poñer a funcionar a lexislatura, porque o escenario de terceiras eleccións non garantiría un resultado que permitise construír maiorías claras. O xogo da repetición electoral, polo que apostaron Feijoo e Vox, non traería nada bo.

Formar Goberno e evitar novas eleccións é xa positivo en si mesmo. E, co resultado das urnas, só o PSOE está en condicións de encabezalo. Ademais, a coalición progresista liderada polo PSOE implica unha barreira contra o populismo dunha ultradereita que en democracias experimentadas tamén tería enfronte a liberais e conservadores. A coalición progresista implica a defensa das liberdades, dos dereitos sociais e do Estado autonómico fronte ao ideario das dereitas, cada vez máis orientado pola extrema dereita. De feito, o 55 % dos galegos votamos en abril e novembro polas forzas de progreso, e só o 44 % por PP, Vox e Cs.

O Goberno progresista vai desenvolver a axenda social, prioritaria para unha Galicia con salarios e pensións máis baixas. Seguiremos subindo as pensións, o salario mínimo e o soldo dos empregados públicos, e continuaremos cun novo estatuto dos traballadores, suprimindo copagamentos farmacéuticos, con máis gasto educativo, baixando o IVE á hixiene feminina, con máis dereitos de paternidade... Un Goberno, pois, para a cidadanía.