O «vakner»


Non hai moito faláronme do vakner, un animal salvaxe e maligno que aparece minimamente descrito no diario de viaxe dun peregrino armenio de nome Mártir ou Martiros que foi bispo de Arzendjan (Armenia). Este peregrino chegou a Compostela a través do Camiño do Norte no ano 1491 e, despois de recibir a beizón do Apóstolo Santiago, dispúxose a camiñar cara aos confíns do mundo ata chegar á praia da Virxe, onde atopou a igrexa de Santa María de Fisterra.

Contaba que se enfrontara a grandes contratempos antes de chegar ata alí, atopándose con todo tipo de bestas bravas e perigosas e tamén co temido vakner, do que milagrosamente conseguira fuxir ante o abraio da veciñanza, que non daba creto, xa que, segundo dicían, ata grupos de vinte persoas non foran quen de pasar ante a súa presenza. A denominación de vakner é estraña no noso contexto lingüístico e probablemente fose un préstamo doutra lingua, ou incluso pode que non figurara ben escrita no relato orixinal do peregrino.

Hai moi pouca información sobre o ente ou becho que viu Mártir, pero si se conservan moitas historias escritas sobre el, que falan de diferentes tipos de bestas ou de seres fabulosos, mais dende a racionalidade quizais a explicación máis crible poida ser a que fala dun lobo de grandes dimensións que tivese contraído a rabia selvática, a cal lle provocaba unha gran fereza que o convertía en máis daniño. Certo é que a presenza do lobo está constatada nos montes entre Dumbría e Fisterra naquel tempo e aínda na actualidade.

Por outra banda, vargr en nórdico antigo significa lobo, e o parecido entre palabras é razoable, como tamén o é fafner, nome do dragón máis coñecido da mitoloxía nórdica que, neste caso, podería achegarnos tamén á figura deste mítico animal tan presente nalgunha das nosas máis arraigadas tradicións. Sexa como fose, o vakner está aí, e dende a historia escrita por Mártir chegou a converterse nun asunto de estudo pero, sobre todo, nun importante valor lendario do impresionante tramo do camiño que vai de Santiago de Compostela ata Fisterra.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
31 votos
Comentarios

O «vakner»