Verás, Fran


Fran Rivera é un señor que gañou a vida torturando touros (un mamífero sentinte) diante de xente que goza e é feliz vendo esa barbaridade atávica. Chámanlle arte a iso, e a Fran Rivera, maestro. Viva a semántica. Ese señor de traxe de luces e poucas luces declarou nos medios hai uns días que se a un home lle chega polo WhastApp un vídeo de contido sexual (protagonizado por unha muller, claro, cambiaría o conto se fosen dous homes queréndose tenramente e dándose trabadas agarimosas nos lóbulos das orellas), pois iso, que se a un home lle chega iso ao teléfono pois que ten que compartilo a todo correr... Con outros homes, claro. Se logo a protagonista se suicida pois vale. Fran di que iso é algo propio da masculinidade.

Verás, Fran, isto da masculinidade haino que revisar. Sabes por que? Porque por tíos que din cousas coma as que ti dixeches e que son coma ti esta sociedade non dá progresado.

Voucho explicar moi fácil. Ata ti o vas entender. Por moito que ti coides que tes determinadas pulsións irrefreables masculinas, do tipo chamar aos teus colegas para pasarlles o vídeo sexual (de mulleres, eh!, sexamos machotes), hai unha cousa que se chama racionalidade, moral, bo gusto e decencia. Incluso educación ou humanidade. O normal non é que os tíos compartamos eses vídeos. O normal é que nos repugne e lle montemos unha boa a quen nolo envíe.

E verás, Fran, aínda que penses que non ten importancia isto que digo en realidade ten moita. Unha muller matouse por iso. Por masculinidades coma a túa e coma a de ducias de homes (machos) que se pasaron o vídeo entre risas e morbosidade. Tiarrazos. Machotes. Masculinos.

A masculinidade, como calquera outra cousa, constrúese entre todos e todas. Pero no fundamental, entre todos. O patriarcado (ideoloxía que, mira ti que casualidade, en España adoita ser favorable á tauromaquia, xa coincidides nunha cousa) explícanos dende pequenos, aos homes coma ti e coma min (os dous somos homes e nos chamamos igual, outra casualidade) que as mulleres poden ser consideradas cousas (aí está o porno) e que como somos machos (coma bestas en manda) todo nos está permitido no referido á nosa concepción e uso do sexo delas.

Pois iso, Fran. O patriarcado di que somos así e que non podemos ser doutra maneira. Macholos. Señoros. Iso toca cambialo, Fran, porque si que podemos. Así que, por se acaso, tocaio, a min non me mandes vídeos por WhatsApp. E cando abras a boca, que sexa para falar de touros.

Por Francisco Castro Escritor e director xeral de Editorial Galaxia

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
47 votos
Comentarios

Verás, Fran