Caravaggio


Michelangelo Merisi da Caravaggio segue a ser un dos pintores máis admirados de todos os tempos, malia ter morto en 1610, aos 38 anos de idade. A súa pintura, fera, arrebatada e chea de paixón, anunciou a chegada do Barroco con tanta forza e vigor que nin sequera esta gran revolución puido logo deixalo a el nunca detrás. Hoxe é o día que Caravaggio segue a ser o pintor preferido de moitos amantes das artes da representación gráfica, pola forza e orixinalidade das súas figuras e composicións.

A noticia máis novidosa sobre a súa vida produciuse non hai moito, e non é irrelevante. Despois de supoñelo morto, durante catro séculos, a causa da sífilis, resulta que esta afirmación acaba de ser desmentida por sete científicos franceses e italianos do IHU Mediterranée Infection de Marsella, que probaron que o artista finou por unha infección causada polas feridas que sufriu durante unha pelexa con espada. O que parece moi crible, porque o mozo Caravaggio tiña o costume de learse con fereza. Unha desgraza, porque, a onde tería chegado na súa evolución pictórica se cumprise os anos de Picasso, por exemplo? É unha pregunta que non terá resposta, pero que aí queda.

O descubrimento da causa da súa morte, publicado na prestixiosa revista Lancet Infectious Deseases, non cambia nada na perspectiva pictórica, ben é certo, pero achéganos á realidade vital deste xenio indiscutible, mestre do claro-escuro, que soubo estruturar auténticas obras mestras, como A vocación de San Mateo, na igrexa Saint-Louis-des Français de Roma, entre moitas outras que seguen a causar asombro pola súa singular orixinalidade, perfección e, digamos, modernidade.

O feito de que morrese por unha ou outra causa non é un descubrimento que vaia cambiar a súa realidade histórica ou creativa, pero suma un dato complementario sobre unha figura sen comparanza. Por outra parte, se se ten en conta a súa vida, chea de desafíos e de aventuras, estamos ante un dato moi crible. De Caravaggio pódense dicir moitas cousas boas como pintor, pero non que fose un home prudente, sociable e de bo carácter. Porque isto non encaixa co que sabemos del. Mais, se cadra, de non ser como era, nunca tivera feito a obra que fixo. Case seguro.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
4 votos
Comentarios

Caravaggio