Terra rota


África está partindo. Hai un par de semanas, unha familia estaba tranquila ceando na súa casa de madeira e lata en Kenya cando un ruído de troncos esfarrapados os arrincou de alí, a tempo de ver, atónitos, como o chan engulía o seu fogar. Agora unha longuísima fractura percorre Kenya tragando estradas, animais e casas. Algún científico dixo que, nuns millóns de anos, haberá dúas Áfricas, unha a cada lado desta greta. Se fósemos da Grecia clásica, creriamos que isto é un mal agoiro, pero como só somos habitantes da posmodernidade nihilista, cremos que non é máis ca un simple burato no chan nun lugar onde viven persoas que, de certo, nos dan absolutamente igual, tan igual coma a terra na que viven e as casas sen as que quedaron.

A min, en cambio, pareceume a única nova digna de tal nome na prensa destes días. O resto son noticias sabidas que gastan tempo para deixarnos como estabamos. Unha cidadá e a súa sogra pelexan por non facer unha foto. Unha señora inventa un máster para decorar un currículo. Un home que non se aclara. Dá igual que todo o iso o fagan raíñas, presidentas e políticos. O que importa é que hai un burato en África, e dentro dun millón de anos, cando en España todo siga igual, haberá dúas Áfricas. O dobre de pobres e famentos, o dobre de guerras, o dobre de mulleres violadas e secuestradas, o dobre de elefantes extinguidos e o dobre de parellas europeas de lúa de mel que, mentres discuten coas sogras e falsifican currículos, verán que un estreito de mar salgado supón a oportunidade de mirar dobremente para outro lado, crendo dobremente que son importantes as cousas que, en fin, só demostran que somos bastante idiotas.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
20 votos
Comentarios

Terra rota