A mnistía Internacional traballa nun documento para recomendar aos Gobernos que legalicen a prostitución. O documento está pendente dunha votación, pero, ao coñecerse a noticia, máis de 400 organizacións que defenden os dereitos humanos manifestáronse en contra, e, xunto a elas, actrices famosas como Meryl Streep, Emma Thompson ou Kate Winslet.
O problema é complexo e Amnistía Internacional representa neste caso a postura de moitas persoas preocupadas e involucradas na defensa das mulleres explotadas polos proxenetas. Non cabe dúbida de que a súa intención é mellorar a situación desas mulleres, pero a legalización non parece ser o bo camiño, igual que non o sería legalizar a escravitude ou o traballo infantil, aínda que sen dúbida mulleres, nenos e escravos estarían mellor legalizados que sen legalizar.
A dificultade para erradicar eses males non debe ser un argumento para legalizalos: hai que loitar contra eles, non camuflalos. Legalizar a prostitución equivale a converter un ser humano nun obxecto de consumo, exactamente igual que o é admitir a escravitude ou a explotación da infancia no traballo.
Unha situación inxusta non debe ser legalizada porque iso a converte socialmente en xusta, trastornando así o sentido do ben e do mal, que é o peor que pode pasar nunha sociedade. Confiemos en que Amnistía Internacional busque mellores solucións ao problema. Hainas, e delas falaremos.