A costa de xaneiro


No 2015 as pensións subirán un 0,25 %. A cifra tráeme á cabeza o 26 % de suba de soldo que se aplicaron directivos de Caixa Madrid, pero mellor non se amargar inútilmente. Eu fixen a conta, e vou gañar 5,10 € máis; pouco é, pero mellor que a conxelación. Leo que os traballadores galegos, coa reforma fiscal, van gañar 24 € máis ao mes; tampouco é para botar foguetes, sobre todo tendo en conta que na declaración de 2016 se lles vai ir case toda a ganancia, pero xa da para celebralo cunha comida. Polo meu barrio, zona Norte de Madrid, de medio pelo, unha parella pode comer por 24 €, unha comida caseira, con pratos de culler e bos guisos ou callos ou costeletas de porco, pan, viño e postre. Sen luxos, pero ben cociñado. Comentaba hai pouco Fernando Ónega a opinión dun empregado de banco de que se estaba a mover máis diñeiro e que o ambiente volvía ser o de antes. Eu, a verdade, tanto non diría. Antes polo meu barrio, por estas datas, víase tanto abrigo de visón e tanto coche de alta gama que isto parecía Manhatan. Pero é certo que de novo nos bares de Bravo Murillo, que é unha rúa moi popular, vese moita xente tomando un aperitivo en mesas ao sol.

Está realmente animado. Eu tomei no mostrador, unha cana e un pincho de tortilla de pataca moi bo e un mexillón en escabeche, por 2,50 €. E quédanme aínda 2,60 para seguir subindo a costa de xaneiro.

Que sexa con saúde, é o meu desexo para todos vostedes.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
55 votos

A costa de xaneiro