Hai cousas que, por absurdas, merecen ser incontestadas. Nun principio non pensaba escribir disto, pero non era un caso illado. Aínda queda xente que pensa que o galego é un dialecto, que cre que os idiomas os inventan catro filólogos aburridos. Que saber falar galego é perder o tempo. Iso doeume. Hai quen di que deben estudarse linguas máis elementais. Non sei exactamente que é o que define iso. Os idiomas poden ter distinto poder, definido polo número de falantes, pero todos teñen o mesmo valor, porque coinciden na mesma función: comunicarse, expresar. Está claro que hai xente que non ten a mesma concepción e consideración sobre os distintos idiomas. Aínda que neguen ter algo en contra do galego, atrévense a suxerir a quen lle envía un currículo que elimine o coñecemento desta nosa lingua nas súas credenciais. Menos mal que non ten nada contra o galego. Vaia contradición. Se non lle molestara, non asesoraría a negación do coñecemento da lingua. A repetida pregunta de por que falas ou escribes en galego é terrible. Pero respóndese cun «¿e por que non?». ¿Ás declaracións incontestables... que resposta dar?