En breve o transbordador espacial Endeavour realizará a súa derradeira misión, na que transportará ata a estación espacial internacional un observatorio de materia escura e antimateria, inspirado no éxito dun experimento realizado no Discovery en 1998 (foi a derradeira visita dun transbordador á estación MIR). O líder do proxecto, o premio Nobel de Física Samuel Ting, estivo en Galicia hai uns meses, e contou algúns detalles íntimos das dificultades que padeceu, entre elas o seu conflito co responsable da NASA, que chegou a cancelar o proxecto. Ting recorreu directamente ao Congreso dos EE.UU., que desbloqueou a situación e obrigou á NASA a rectificar. A aventura espacial xa non goza dos bos días de Gagarin, hai agora 50 anos: con este voo do Endeavour, e outro en discusión do Atlantis, os EE.?UU. poñen fin a 30 anos do programa de transbordadores e quedarán sen misións espaciais tripuladas. Pero o utilitarismo aínda non o invadiu todo: o observatorio colocado polo Endeavour en órbita estará en funcionamento dúas décadas, para profundizar na principal incógnita que ten o ser humano.