NON podo sacalo da cabeza. Dende que a pasada semana lin en La Voz o glorioso titular, eu, obsesionado, non consigo olvidar o apotegma magno: Galicia es brutal. Pronunciaba tal sentencia unha triunfista operadora á que alcuman Campanilla os seus compas, triunfantes tamén. Galicia es brutal. Perdía os meus instintos entre as curvas de tal xubiloso sintagma cando o domingo, agosto, dezaoito, outro titular incrementou a miña sensación de absoluto marabillismo. Pepe Cuíña: «No moveré un dedo para ser el sucesor de Fraga». O dedo de Cuíña, unido á sentencia de Campanilla, son demasiado para o meu decadente cerebro. ¿Que pretendía o conselleiro ao declarar tal vehemencia? ¿Que ten o dedo de Pepe que non teña calquera outro dedo deste territorio? ¿Concéntrase a forza dos astros no dedo do amadísimo Cuíña? Probablemente Pepe non moverá un dedo porque coñece o fondo do asunto: Galicia es brutal. Aquí os dedos non serven de nada (que le pregunten a Baltar). Todo segue o seu monótono curso: o irrenunciable destino. Galicia es brutal. Penso unha e outra vez en tal certeza mentres o dedo de Cuíña, como un delirio, traza círculos entre as nubes de agosto. Non podo resistilo. Oh, si: Galicia es brutal. ¡Ave, Pepe!