XOSÉ CARLOS CANEIRO DE SOL A SOL
30 ene 2002 . Actualizado a las 06:00 h.Irlanda é verde. Galicia é verde. En Irlanda choven dólares como se fosen flores dunha novela de Márquez. En Galicia, a penas. Hai unha diferencia fundamental: eles saben vender. O destino dos nosos días vai ligado irremediablemente a esta realidade. As persoas e países astutos en amosar as súas venturas, escasos, son os que dun ou doutro modo conseguen éxito e fama. A autopropaganda é unha virtude que non se estudia nas universidades e, sen embargo, resulta ser o máis valioso dos títulos curriculares. A Galicia fáltalle autopropaganda. Galicia precisa quererse un pouco máis a si mesma. Presumir. Enorgullecerse. Cantar a diario a luz que esconde tralo ceo gris que, por veces, decora o seu horizonte. Venderse mellor. A súa cultura, por exemplo. ¿Ven vostedes que delicados son en Irlanda coa súa música, escritores, artistas? Aquí, non. Parecen poucos os que se decataron da verdade que hai anos proclamo: o gran patrimonio deste país é a cultura. Dende a cultura levántanse imperios e prosperidades. Oxalá quen goberne os nosos destinos considere estas palabras. Para que chovan flores. Para que Galicia sexa, por fin, esa novela feliz que todos soñamos.