Os museos regalan arte e flores para celebrar o Día de Rosalía

A Rede Museística ofrecerá agasallos o mércores 24 dentro dun programa cultural organizado pola Vicepresidencia da Deputación que inclúe tamén teatro e intervencións artísticas

Presentación das actividades polo Día de Rosalía
Presentación das actividades polo Día de Rosalía

Lugo / La Voz

A vicepresidenta da Deputación, Maite Ferreiro, presentou a programación que organizará ao longo do ano a área de Cultura arredor do Día de Rosalía, que se celebra o mércores 24 de febreiro. Tomando como punto de partida esta data, a Vicepresidencia programará, en colaboración con concellos, asociacións e centros educativos, quince representacións teatrais das obras A pluma viva de Rosalía, de Os Quinquilláns; Rosalía, de Culturactiva, e A viaxe de Rosalía, de Urdime, montaxes inspiradas na vida e obra da autora. Tamén se promoverán vinte intervencións artísticas en espazos públicos ou xestionados por asociacións e centros educativos a cargo dos muralistas e grafiteiros Pablo Lage (Van Kraft) e Manuel Andrés Pallín de Concepto Circo.

Por outra banda, o mercores 24, Día de Rosalía, os catro museos da Rede Provincial (Museo Provincial, Museo do Mar de San Cibrao, Pazo de Tor e Fortaleza de San Paio de Narla) agasallarán as visitas cunha lámina deseñada pola ilustradora guitiricense Alba Nimbos, un debuxo en carbón inspirado no poema Cando a luniña aparece de Cantares Gallegos, e unha flor naturalAs láminas poderán recollerse no horario habitual de apertura dos museos, seguindo un protocolo adaptado á situación sanitaria: control de temperatura, rexistro dos datos de contacto, distancia de seguridade e xel hidroalcólico antes de recollelas.

A maiores, a Vicepresidencia sumarase á lectura do manifesto do Día de Rosalía da Asociación de Escritores en Lingua Galega (AELG), ás 11.30 no Parque de Rosalía.

«Son propostas que invitan a achegarse á figura de Rosalía de Castro desde unha perspectiva actual, que sitúan a esta autora cabeceira da literatura galega tamén como referente na defensa das mulleres, dos dereitos sociais e da lingua e da cultura. Cremos que inciden nese carácter popular, festivo, e tamén reivindicativo co que se ven celebrando o Día de Rosalía desde hai unha década, co impulso do mundo da cultura e do ensino. Con este catálogo de propostas, queremos seguir involucrando ao tecido asociativo pero tamén aos concellos na revalorización da figura de Rosalía», explicou Maite Ferreiro. A vicepresidenta sinalou que «o ano pasado concentramos a programación no mes de febreiro pero, dada a situación sanitaria, neste edición optamos por flexibilizar o calendario e facilitar que estas actuacións e intervencións artísticas poidan realizarse ao longo do ano. A obra e a figura de Rosalía admite múltiples enfoques, polo que calquera data será boa para achegarse a ela a través destas propostas culturais».

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Os museos regalan arte e flores para celebrar o Día de Rosalía