A galería Sargadelos de Lugo acolleu onte a presentación dos 15 primeiros volumes da colección «A grande obra dos Camiños de Santiago-Iter Stellarum», editada por Hércules de Ediciones. Trátase dun ambicioso proxecto editorial que aspira a recompilar toda a riqueza patrimonial, social e cultural das vías de peregrinación a Compostela, que ata agora recollían máis de 5.000 títulos independentes. «Esta obra está pensada para que dure séculos en bibliotecas, arquivos... Como un Códice Calixtino do século XXI», destacou o presidente da editora, Francisco Rodríguez, que subliñou a perdurabilidade do papel fronte a outros soportes. Personalidades como o subdelegado do Goberno, Ramón Carballo, ou a deputada provincial Pilar García Porto, apoiaron un acto no que interviñeron o coordinador da obra, Segundo Vázquez Portomeñe, e o historiador Ricardo Gómez Polín.