NO OUTEIRO | O |
16 dic 2004 . Actualizado a las 06:00 h.CONVERTIDA por momentos naquela Escarlata O'Hara do puño en alto que choraba ao ceo, dixo: «Escúchennos con el corazón más limpio que puedan». Pero pouco tiñan que ver estas verbas co filme de Fleming. Era a nai de Daniel, un dos 192 asasinados o 11 de marzo, quen suplicaba así. ¡Facía falla! Pilar Manjón, a presidenta da Asociación de Vítimas del 11-M, estivo certeira. Foi dura nas críticas aos partidos políticos e aos medios de comunicación. Aínda que, en realidade, toda a sociedade estaba na mira das súas palabras; que as tivo de agradecemento para todos cantos lles axudaron. A representante da Asociación do 11-M deixou claro que as vítimas eran eles. (Nese intre as Señorías xa non sabían onde meterse). Afirmara antes, categórica, que a asociación que representa rexeitaba calquera terrorismo, «venga de donde venga», concluiu; coincidindo nisto coa intervención posterior de Alcaraz, voceiro da AVT. Pilar Manjón tivo aínda palabras para outras reflexións. Así, engadiu que lles interesaba saber «que ocorreu antes do 11-M», en referencia a si se puideron ou non evitar os atentados de Madrid. ¡Comprensible para quen sofre a dor! Asemade, queixouse da utilización das imaxes que, segundo recordou, estaban baixo segredo de sumario.