Propoñen nomear fillo predilecto de Quiroga ao historiador e escritor Xosé Estévez
QUIROGA
Nado en 1943, colaborou na creación da ruta literaria do Concello e recentemente doou á biblioteca municipal a súa colección de libros en galego
11 ene 2025 . Actualizado a las 21:41 h.A xunta de goberno do Concello de Quiroga aprobou incoar un expediente para nomear fillo predilecto do municipio ao profesor, historiador e escritor Xosé Estévez Rodríguez. A iniciativa partiu do BNG, que presentou unha solicitude neste sentido seguindo o regulamento municipal de títulos, honores e distincións oficiais. Despois deste acordo, abriuse unha fase informativa e de verificación na que se preparará o expediente para presentalo á alcaldía. O alcalde poderá remitir despois este expediente á comisión informativa de Cultura e elevar a proposta ao pleno. Para facerse efectivo, o acordo deberá aprobarse por maioría absoluta.
Nado en Quiroga en 1943, Xosé Estévez formouse primeiramente como sacerdote no seminario de Lugo e exerceu como párroco na Fonsagrada entre 1967 e 1969, aínda que despois abandonou a carreira eclesiástica e contraeu matrimonio coa tamén profesora María Isabel Goñi Olea, coa que tivo dous fillos e unha filla, esta última falecida no 2006. Licenciouse en Filosofía e Letras pola Universidad Complutense de Madrid e en 1973 trasladouse ao País Vasco. Obtivo o doutoramento na Universidad de Deusto e exerceu como profesor de Historia —en distintas modalidades— ata a súa xubilación.
Estévez é autor de numerosas obras de temas históricos en castelán e publicou en galego libros como Impenitencias galeuzcanas, Castelao e o Galeuzca, A lagoa da memoria e Un crego atípico na Fonsagrada 1967-1969, entre outros. Sobre a súa terra natal publicou as obras O val de Quiroga e a Galiza: na saudade do corazón e Manuel María e o val de Quiroga. O escritor quirogués mantivo tamén amizade co poeta Uxío Novoneyra e mediou para que a súa obra Os eidos fose traducida e publicada en lingua vasca.
Desde o BNG quirogués sinalan por outra parte que «a súa figura foi fonte de inspiración e supervisión» para a creación no 2023 da ruta turística e cultural «Quiroga, territorio literario», dedicada a sete escritores naturais do municipio ou vinculados estreitamente con el. «Nun recente acto de xenerosidade coa súa Quiroga natal —engaden—, Xosé Estévez vén de ofrecer ao Concello de Quiroga a doazón da súa biblioteca persoal de libros en galego», formada por centenares de obras.