«Sempre vos levarei no corazón»: homenaxe á porteira do colexio Torre de Lemos
MONFORTE DE LEMOS
Organizouno a asociación de nais e pais do centro dentro dun magosto ao que asistiron 200 persoas
19 nov 2025 . Actualizado a las 18:06 h.A asociación de nais e pais da Fundación Torre de Lemos viviu este sábado unha xornada intensa de convivencia e emoción co seu magosto anual, que incluíu unha homenaxe que a súa protagonista non agardaba. Preto de 200 persoas, entre familias, alumnado e profesorado, participaron no campo da feira de Monforte nun encontro que foi cualificado polos organizadores como un éxito.
A velada contou con animación infantil para os máis pequenos e pechou co concerto da Cé Orquestra Pantasma, que puxou a bailar a varias xeracións cun repertorio festivo.
Pero o momento máis destacado da noite chegou cunha homenaxe sorpresa á porteira do centro, Araceli, que poñía fin estes días á súa vida laboral tras varias décadas de dedicación.
Visiblemente conmovida, Araceli recibiu da Anpa un agasallo e un ramo de flores como mostra pública de agradecemento polo seu traballo e, especialmente, polo agarimo co que sempre tratou ao alumnado e ás familias. «Quero dar as grazas ao Anpa Torre de Lemos por esta sorpresa que non me esperaba. Todo o que fixen estes anos fíxeno de corazón, por iso sempre vos levarei comigo», declarou ante os presentes.
A súa conexión coa comunidade foi un tema recorrente durante a homenaxe. «Moitas grazas a todos os nenos e familias que sei que vos acordades de min. Sempre vos levarei no corazón»", engadiu.
Nenos, profesores e membros da xunta directiva tomáronlle a palabra para lle trasladar o seu cariño e recoñecemento, salientando o seu papel esencial nos cursos de educación infantil e os primeiros anos de primaria, onde o seu coidado e proximidade deixaron unha fonda pegada en varias xeracións.
O evento non só serviu para celebrar unha das tradicións máis arraigadas en Galicia, senón que se converteu nun acto de recoñecemento colectivo que reforzou os lazos dentro da comunidade escolar de Monforte, poñendo o broche de ouro á traxectoria profesional dunha figura moi querida.