A nova edición do certame de poesía recitada celebrarase no centro cultural A Casa da Memoria
18 mar 2026 . Actualizado a las 13:32 h.O municipio de Bóveda acollerá o próximo día 28 unha nova edición de festival Slam Poetry, un certame de poesía orixinal recitada que se celebrou por primeira vez neste concello en marzo do 2023. O escenario será o centro cultural A Casa da Memoria, xestionado pola asociación A Memoria é Náufraga na localidade de Xullán, na parroquia de Tuimil. O festival comezará ás 18.30 horas e constará de dúas roldas. O público será quen elixa ao gañador.
O festival Slam Poetry celébrase desde hai anos en diversas localidades de Galicia e doutras comunidades. En Bóveda foi impulsado polo poeta Xosé Casar Gómez, natural do municipio, quen sinalou que este é o primeiro de Galicia organizado nun concello rural. Os gañadores de cada festival local poden participar despois nunha fase galega e noutra de ámbito estatal. Tanto a temática dos poemas como o idioma no que son escritos e recitados depende do que decidan os participantes no certame.
Despois do festival, a partir das 20.30 horas, o centro A Casa da Memoria acollerá un concerto do cantautor madrileño Fito Mansilla que forma parte da súa xira Canciones de amor y guerra, baseada nun disco co mesmo título.