Os entroidos de Salcedo e Chantada, no cine da man de Kepa Junkera

O tradicional carnaval do Oso da Pobra abrirase o 3 de marzo coa proxección do filme «Mar de terra»


monforte / la voz

O programa das festas de carnaval do municipio da Pobra do Brollón comprenderá a proxección do filme Mar de terra, unha longametraxe documental realizada por iniciativa do célebre acordeonista vasco Kepa Junkera, que recolle escenas dos entroidos tradicionais de Salcedo e Chantada. A película foi proxectada por primeira vez na última edición do Festival de Cine Internacional de Ourense, a finais do pasado novembro, e ata agora non fora mostrada en público no sur lucense.

A proxección terá lugar no local multiusos de Salcedo o 3 de marzo, na véspera da saída do Oso que protagoniza o festexo. A sesión comezará ás 17.00 horas e contará coa presenza do realizador ourensán José Antonio Blanco, director da película e coautor do guión xunto co propio Kepa Junkera. O músico non poderá asistir ao acto debido ao seu actual estado de saúde, xa que se está recuperando dun ictus que sufriu en Bélxica a principios de decembro.

O filme Mar de terra está dedicado a diversos entroidos tradicionais galegos, como os de Manzaneda, Laza, Verín, Xinzo de Limia e Viana do Bolo, ademais dos do sur lucense. As imaxes que recollen a festa do Oso de Salcedo e o Entroido Ribeirao chantadino foron filmadas o ano pasado durante a celebración destes festexos. Segundo explica Juan Carlos González, presidente da asociación de amigos do entroido tradicional de Chantada, o músico e o equipo de filmación estiveron na parroquia de Santiago de Arriba o Domingo de Entroido -penúltimo día dos festexos- e o seguinte luns as gravacións realizáronse en Salcedo.

González sinala por outro lado que a súa asociación espera poder organizar máis adiante unha proxección da película en Chantada. «Pero preferimos esperar ata que Kepa Junkera estea restablecido e poida vir aquí, porque nos gustaría que estivese presente ese día», explica.

O músico mantén desde hai anos unha estreita relación cos entroidos tradicionais do sur lucense e doutras partes de Galicia, que ocupan un importante papel no seu disco Galiza, editado no 2014. Junkera ten visitado con frecuencia os escenarios destes festexos e en decembro do 2017 actuou en Salcedo no Festival Mais -un concerto solidario que tiña por finalidade reunir alimentos para persoas necesitadas- en compañía dos personaxes típicos do carnaval do Oso e do Entroido Ribeirao.

Segundo explicaron no seu momento os responsables do proxecto, a idea de realizar este filme surxiu de forma improvisada e as gravacións foron feitas en poucas xornadas. Mar de terra é a primeira longametraxe de Blanco, que tamén codirixiu o docudrama Podrías ser ella, premiado no Festival de Málaga.

Os programas de dúas festas singulares

O primeiro dos entroidos tradicionais do sur lucense que empezará a celebrarse este ano é o de Chantada. A continuación detállanse os actos previstos nestes dous festexos.

Entroido Ribeirao. A primeira xornada será o día 17. Ás 12.00 haberá un desfile na capital municipal con personaxes deste carnaval e dos entroidos de Salcedo, Viana do Bolo, Bande e Campobecerros, no municipio de Castrelo do Val. Na parroquia de Santiago de Arriba, os volantes, peliqueiros e mecos farán aparición a partir das 16.00 horas. O festexo nesta localidade seguirá o mesmo horario de inicio nas seguintes xornadas, o Domingo Corredoiro -día 24-, o Domingo de Entroido -3 de marzo- e Martes de Entroido, o 5 de marzo. O festexo rematará co chamado choro do pucho.

Entroido de Salcedo. Comezará o 3 de marzo. Despois da proxección de Mar de terra, ás 18.00 horas sairá un pasarrúas con madamas e danzantes. Ás 18.30, o músico Tico -antigo cantante e teclista do grupo Yellow Pixoliñas- pronunciará o pregón. Ás 20.00 comezará un baile co Dúo Camelia e ás 22.00 haberá unha sesión de teatro popular, seguida dunha verbena coa orquestra Os Trovadores. O día 4, o Oso e os seus criados saíran ás 17.00 horas. Pola noite -a partir das 22.00 horas- haberá unha cea popular e un baile coas orquestras Capitol e Israel. O día 5, ás 18.00 horas, haberá un espectáculo para nenos con Peter Punk Pallaso e ás 21.00 comezará unha paellada e un baile coa orquestra Los Satélites.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Os entroidos de Salcedo e Chantada, no cine da man de Kepa Junkera