«Pazo de Tor», poemas de inspiración monfortina

Aos 96 anos de idade, Luz Pozo publica un libro que surxiu das súas visitas ao edificio, relacionado coa súa historia familiar


monforte / la voz

A ribadense Luz Pozo Garza, a máis veterana das escritoras en lingua galega, acaba de publicar aos 96 anos de idade o poemario Pazo de Tor, inspirado no histórico edificio de Monforte, no que residiron en tempos algúns dos seus antepasados. A obra apareceu na editorial Alvarellos -que xa publicou anteriormente outros libros seus- nunha edición preparada pola profesora e escritora Carmen Blanco e cun prólogo de Víctor Freixanes, presidente da Real Academia Galega. Segundo explica Quique Alvarellos, director da editorial, «Luz Pozo empezou a compoñer este libro a raíz dunha visita que fixo ao pazo hai arredor de dez anos».

A autora, que reside actualmente na Coruña, sinala que o seu apelido materno procede da antiga familia Garza, vinculada ao pazo monfortino desde o século XIV, aínda que o seu parentesco cos últimos propietarios era moi distante e non chegou a ter unha relación persoal con eles. Nunca se encontrou con María Paz Taboada, que legou o pazo á Deputación.

O libro consta de trinta poemas que están inspirados en diversas visitas que a escritora fixo ao pazo en tempos máis ou menos recentes. «En xeral, os meus libros de poemas teñen unha estrutura unitaria e xiran arredor dun mesmo tema, e con este sucede o mesmo, porque todos os textos que contén están relacionados co pazo de Tor», sinala.

A escritora explica así mesmo que desde a súa infancia oíu falar a miúdo do pazo e da súa relación coa familia Garza á súa nai e a outros parentes. «Para min representa toda unha historia que non se olvida e que continúa vixente, e paréceme moi bonito que siga existindo e que estea tan ben conservado despois de tantos séculos», engade.

Nas visitas que fixo a Tor -di por outra parte- chamáronlle moito a atención aspectos como a estrutura arquitectónica do edificio e a súa colección de antigos instrumentos musicais. Coñece ben a súa historia e recorda que «foi destruído dúas veces, na época dos irmandiños e na invasión francesa». Non obstante, Luz Pozo puntualiza que Pazo de Tor é unha obra poética e non un estudo ou unha recreación histórica. «Para coñecer a historia do pazo xa hai traballos publicados por historiadores e este libro é algo moi distinto, no que ten moita importancia a imaxinación», comenta. Quique Alvarellos indica a este respecto que «os poemas reunidos no libro «caracterízanse por un ton intimista e lírico que está na liña da poesía máis espiritual de Luz Pozo».

Novoneyra e Manuel María

Pozo apunta por outro lado que coñeceu persoalmente a Uxío Novoneyra e Manuel María, dous poetas que estiveron moitas veces no pazo de Tor e que tiveron moita relación con el. «Tiven amizade con eles e sobre todo con Manuel María, pero curiosamente nunca chegamos a falar do pazo e non souberon que a miña familia estaba vinculada con el dalgunha forma», agrega.

Nova entrega dunha obra que comezou a aparecer hai 71 anos

O libro Pazo de Tor vén incrementar unha extensa obra literaria que comezou a formarse en 1948 coa publicación en Vigo do poemario en castelán Ánfora. A primeira obra en galego de Luz Pozo, O paxaro na boca, apareceu en Lugo en 1954 e inaugurou as publicacións da editorial Xistral, fundada por Manuel María e Ánxel Johán e trasladada máis tarde a Monforte. A propia escritora ten declarado que foi Manuel María quen a animou a escribir en galego, que a partir de entón foi o seu idioma literario predominante.

Desde esa época, Luz Pozo foi publicando numerosos libros de poemas e ensaios entre os que figuran títulos como Concerto de outono, Códice Calixtino, Medea en Corinto, As arpas de Iwerddon, Diálogos con Rosalía, As vodas palatinas ou Rosa tántrica. A súa obra poética foi traducida a diversas linguas, como o catalán, o inglés, o francés, o alemán, o húngaro o ruso e o xaponés. En 1996 ingresou na Real Academia Galega como membro numerario. Luz Pozo, por outro lado, estivo casada co escritor quirogués Eduardo Moreiras, falecido en 1991.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
3 votos
Comentarios

«Pazo de Tor», poemas de inspiración monfortina